सुन तस्करी प्रकरणमा पक्राउ परेका जीवन गुरुङलाई १५ लाख धरौटीमा छाड्न आदेश

काठमाडौँ–  काठमाडौँ जिल्ला अदालतले सुन तस्करी प्रकरण अनुसन्धानका क्रममा पक्राउ परेका जीवन गुरुङलाई धरौटीमा छाड्न आदेश दिएको छ। 

जिल्ला न्यायाधीश माधवप्रसाद अधिकारीको इजलासले गुरुङलाई १५ लाख रुपैयाँ धरौटीमा छाड्न आदेश दिएको काठमाडौँ जिल्ला अदालतका सूचना अधिकारी चन्द्रप्रसाद पन्थीले बताए। 

पूर्वउपराष्ट्रपति नन्दबहादुर पुनका सल्लाहकार गुरुङ फागुन १४ गते पक्राउ परेका थिए। उनलाई नेपाल प्रहरीको केन्द्रीय अनुसन्धान ब्यूरो (सीआईबी)ले पक्राउ गरेको थियो।

प्लाटिनम कलेजका कार्यकारी अध्यक्षसमेत रहेका गुरुङ दुबईबाट त्रिभुवन अन्तर्राष्ट्रिय विमानस्थल हुँदै भित्र्याइएको भनिएको १४ किलो सुन तस्करी प्रकरणमा पक्राउ परेका थिए।