कच्चा पदार्थ अभावमा बन्द भए कैलालीका १३७ साना उद्योग

गोदावरी– कच्चा पदार्थको अभावमा कैलाली जिल्लामा सञ्चालित १३७ वटा घरेलु तथा साना उद्योग बन्द भएका छन्। कतिपय उद्योग भने सञ्चालन खर्च जुटाउन नसकेर र केही आफ्ना उत्पादनले बजार मूल्यसँग प्रतिस्पर्धा गर्न नसक्दा बन्द भएका हुन्। 

घरेलु तथा साना उद्योग कार्यालयका अनुसार कतिपय उद्योगका सञ्चालक रोजगारीका लागि विदेश गएकाले पनि उद्योग बन्द भएका हुन्। यद्यपि पछिल्लो समय उद्योग दर्तामा महिलाको स्वामित्व भने उल्लेख्य रूपमा बढ्दै गएको पाइएको छ। महिलाको नाममा निजी फर्म दर्तामा छुटको व्यवस्था भएसँगै उद्योग दर्तामा महिलाको स्वामित्व बढेको छ। 

कैलालीमा हालसम्म १५ हजार ४३४ उद्योग दर्ता भएका छन्। दर्ता भएकामध्ये १३७ उद्योगको दर्ता खारेज भएको छ। उत्पादनमूलक तीन हजार १९४, कृषि छ हजार ४८८, निर्माण दुई, पर्यटनमूलक ६५, सूचना प्रविधि १२, सेवामूलक पाँच हजार ६७३ गरी १५ हजार ४३४ उद्योग दर्ता भएका छन्।

साना उद्योग कार्यालयमा दर्ता भएका १५ हजार ४३४ उद्योगमा २५ अर्ब लगानी प्रस्ताव गरिएको छ। सुदूरपश्चिम प्रदेश सरकारले चालु वर्षमा ‘एक निर्वाचन क्षेत्र एक उद्योग’ कार्यक्रम सञ्चालनका लागि प्रदेश सरकारले एक करोड ५० लाख रुपैयाँ विनियोजन गरेको छ।

कार्यालयका अनुसार दर्ता भएका उद्योगमा नौ हजार १२० महिला र ६९ हजार ६११ पुरुषले रोजगारी प्रस्ताव गरिएको जनाइएको छ। यसैगरी गत आर्थिक वर्ष २०७९/८० मा सो कार्यालयले ५२ लाख १६ हजार राजस्व संकलन गरेको छ। चालु आवको फागुनसम्म एक करोड पाँच लाख राजस्व संकलन भएको छ।