आईपीएल: बेंग्लोरसँग पन्जाब ४ विकेटले पराजित

काठमाडाैँ– इन्डियन प्रिमियर लिग आईपीएलमा रोयल च्यालेन्जर्स बेंग्लोरले दोस्रो खेलमा आएर जित निकालेको छ। पहिलो खेलमा बेंग्लोर चेन्नई सुपर किंग्ससँग ६ विकेटले पराजित बेंग्लोरले सोमबार राति भएको खेलमा पन्जाबलाई ४ विकेटले पराजित गरेको हो।

पन्जाबले दिएको १७७ रनको लक्ष्य बैंग्लोरले ४ बल बाँकी छँदै पूरा गर्‍यो। बैंग्लोरका लागि विराट कोहलीले सर्वाधिक ७७ रन बनाए। दिनेश कार्तिक २८ र महिपाल लोम्रोर १७ रनमा अविजित रहे। त्यस्तै रजत पढिदरले १८ र अनुज रावतले ११ रनको योगदान गरे।

पन्जाबका लागि हरप्रित ब्रार र काशिगो राबाडाले २/२ तथा  हर्ष पटेल र साम कुरानले १/१ विकेट लिए। 

यसअघि बेंग्लोरको एम चेन्नास्वामीमा टस हारेर पहिले ब्याटिङ गरेको पन्जाबले निर्धारित २० ओभरमा ६ विकेट गुमाएर १७६ रन बनायो। पन्जाबका लागि कप्तान शिखर धवनले ३७ बलमा ५ चौका र १ छक्काको सहयोगमा सर्वाधिक ४५ रन बनाए।

प्रभ सिमरन सिंहले १७ बलमा २५ रन तथा जितेश शर्माले २० बलमा २७ रन बनाए। शंशाक सिंहले ८ अविजित २१ रन र साम करनले १७ बलमा २३ रन बनाए।

बेंग्लोरका लागि ग्लेन म्याक्सबेल र मोहम्मद सिराजले समान २/२ तथा अल्जारी जोसेप र यस दयालले समान १/१ विकेट लिए।

जारी आईपीएलमा पन्जाबको यो पहिलो हार हो। पहिलो खेलमा पन्जाबले दिल्ली क्यापिटल्समाथि ४ विकेटको जित निकालेको थियो।