नागरिकता बिक्री प्रकरण: २ अधिकृत पुर्पक्षका लागि थुनामा

काभ्रेपलान्चोक– जिल्ला प्रशासन कार्यालय काभ्रेपलान्चोकबाट विदेशी नागरिकलाई नागरिकता बिक्री गरेको अभियोग लागेका दुई अधिकृतसहित तीन जनालाई जिल्ला अदालतले पुर्पक्षका लागि थुनामा पठाउने आदेश गरेको छ। अदालतले सोही प्रकरणमा संलग्न अर्का एक जनाविरुद्ध पक्राउ पुर्जी जारीको आदेश दिएको छ।

जिल्ला अदालत धुलिखेलमा शुक्रबार भएको थुनछेक बहसपछि न्यायाधीश शिवकुमार पोखरेलको इजलासले नागरिकता बिक्री अभियोगमा पक्राउ परेका अधिकृतद्वय झपेन्द्रराज खरेल र रामचन्द्र अर्यालसहित नागरिकता खरिद गर्ने काठमाडौँ महानगरपालिका–४ का ४० वर्षीय राजु गुरुङलाई थुनामा पठाउने आदेश दिएको जिल्ला अदालतका स्रेस्तेदार कर्णबहादुर राईले जानकारी दिए। 

राईका अनुसार राजुका बाबु हरिभक्त गुरुङलाई पक्राउ पुर्जीको आदेश भएको हो। “खरेल तत्कालीन समयमा जिल्ला प्रशासन कार्यालय काभ्रेपलान्चोकमा अधिकृत थिए भने अर्याल सुब्बा थिए”, उनले भने।

यसअघि गुरुङ बाबुछोरा हङकङ बस्दै आएका थिए। राजु गुरुङले अमेरिका जाने प्रयोजनका लागि काठमाडौँबाट लिएको सक्कली नागरिकताका साथै काभ्रेपलान्चोकबाट नागरिकता र राहदानी खरिद गरेको अनुसन्धानको क्रममा खेलेको जिल्ला प्रहरी कार्यालयका सूचना अधिकृत एवं प्रहरी नायब उपरीक्षक राजकुमार श्रेष्ठले जानकारी दिए। उनका अनुसार नागरिकता फाँटमा अनुसूची मिलाउने र भर्ने सुब्बा रामचन्द्र अर्याल थिए।

सुन तस्करी प्रकरणमा पक्राउ परेका विदेशी नागरिकलाई नागरिकता दिएको अभियोगमा अधिकृतद्वय खरेल र अर्याल अनुसन्धानमा रहेको प्रहरीले जनाएको छ। जिल्ला प्रहरी कार्यालयले गृह मन्त्रालयद्वारा गठित छानबिन समितिले दिएको निर्देशनअनुसार विदेशीलाई नागरिकता दिएको अभियोगमा अनुसन्धान गरिरहँदा गुरुङलाई नागरिकता बिक्री गरेको फेला परेपछि दुई अधिकृत पक्राउ गरी अनुसन्धान शुरू गरेको जनाएको छ। 

प्रहरी नायब उपरीक्षक श्रेष्ठका अनुसार दुवै अधिकृतमाथि स्वदेशी र विदेशीलाई नागरिकता बिक्री गरेको अभियोग छ। प्रहरीले विदेशी नागरिक दावा छिरिङ भनिने निमा तामाङ भएको झूटो विवरण पेस गरी विसं २०७४ पुस २० गते नागरिकता दिलाएको सहित नौ जनालाई नागरिकता बिक्री गरेको अभियोगमा अनुसन्धान जारी राखिएको उनले जानकारी दिए।

अधिकृत खरेललाई यही चैत ३ गते सिन्धुपाल्चोकको मेलम्ची नगरपालिकाबाट र अर्याललाई गत फागुन २४ गते बागमती प्रदेशसभा सचिवालयबाट प्रहरीले पक्राउ गरेको थियो।