लक्षण देखिनुभन्दा वर्षौं अगाडि नै शरीरमा क्यान्सरको संकेत देखिन सक्छः अनुसन्धान

वैज्ञानिकले हालै गरेको एक अनुसन्धानले क्यान्सरको लक्षण देखिनुभन्दा वर्षाैं अगाडि नै शरीरमा क्यान्सर भएको संकेत देखिन सक्ने जनाएको छ। क्याम्ब्रिज विश्वविद्यालयमा नयाँ स्थापना भएको ‘अर्लि क्यान्सर इन्स्टिच्युट’ले उक्त अनुसन्धान गरेको हो।

मानव कोशिकाहरू ट्युमरको रूपमा विकास हुनुभन्दा धेरै वर्ष पहिले नै त्यसमा केही न केही परिवर्तनहरू देखिने गरेको अनुसन्धानमा उल्लेख छ। द गार्डियनका अनुसार यस इन्स्टिच्युटका वैज्ञानिक क्यान्सरले आफ्नो लक्षण देखाउनुअघि नै ती प्रभावित ट्युमरको उपचार गरेर क्यान्सर हुनै नदिने गरी उपाय खोज्नमा केन्द्रित रहेका छन्। यो अनुसन्धानले अहिलेसम्मका क्यान्सरका पूर्वानुमानसम्बन्धी भ्रमहरूबारे चिर्दै क्यान्सर उपचारको लागि नयाँ बाटो खोल्ने यसमा संलग्न वैज्ञानिकहरूको दाबी छ।

"शरीरभित्र क्यान्सर विकास हुन वर्षौंसम्म लाग्न सक्छ, अचानक बिरामीहरूमा देखिनुअघि कहिलेकाहीँ एक वा दुई दशकसम्म पनि यो प्रक्रिया लम्बिन सक्छ," संस्थानका निर्देशक प्रोफेसर रेबेका फिट्जगेराल्ड भन्छन्, "त्यसपछि डाक्टरहरू बल्ल ट्युमरको उपचार गर्न थाल्छन्, जुन त्यतिबेलासम्म बिरामीको शरीरमा फैलिसकेको हुन्छ। हामीलाई एउटा फरक दृष्टिकोण चाहिन्छ, जसले ठूलो संख्यामा मानिसहरूलाई दिइने परीक्षणहरू प्रयोग गरेर क्यान्सरको जोखिममा रहेको व्यक्तिलाई छिट्टै पत्ता लगाउन सक्छ।"

यसको एउटा उदाहरण साइटोस्पन्ज (मसिनो तारमा रहेको स्पन्ज) जसलाई फिट्जगेराल्ड र उनको टोलीले विकास गरेको हो। यसलाई चक्की जस्तै निलाइन्छ, पेटमा स्पन्जमा विस्तार हुन्छ र त्यसपछि बाटोमा अन्ननली कोशिकाहरू जम्मा गर्ने गलेटलाई तानिन्छ। ती कोशिकाहरू जसमा प्रोटीन हुन्छ, जसलाई टीएफएफ–थ्री भनिन्छ, जुन केवल पूर्व क्यान्सर कोशिकाहरूमा पाइन्छ। त्यसपछि रोगीलाई ‘ओइसोफेजिअल क्यान्सर’को जोखिममा छ र निगरानी गर्न आवश्यक छ भनेर प्रारम्भिक चेतावनी दिइन्छ। यो परीक्षण सरल र व्यापक स्तरमा प्रयोग गर्न सकिने बताइएको छ।

यो उपाय क्यान्सरहरूको उपचारका लागि वर्तमान पद्धतिभन्दा भिन्न रहेको फिट्जगेराल्ड बताउँछन्। “अहिले, हामीले धेरै क्यान्सरहरू ढिलो पत्ता लगाइरहेका छौँ र औषधिहरू पनि क्रमशः महँगो हुँदै गएका छन्। हामी प्रायः दशौँ हजार पाउन्डको लागतमा केही हप्ता जीवन विस्तार गर्दैछौँ। यसलाई हामीले अब फरक दृष्टिकोणबाट हेर्नुपर्छ।”