आईपीएल: मुम्बईको लगातार तेस्रो हार

काठमाडौँ– पाँच पटकको च्याम्पियन मुम्बई इन्डियन्स आईपीएल–२०२४ मा लगातार तीन खेलमा पराजित भएको छ।

हार्दिक पान्ड्याको कप्तानीमा रहेको घरेलु टोली सोमबार राति राजस्थान रोयल्ससँग ६ विकेटले पराजित भयो। जारी आईपीएलमा मुम्बई जितविहीन छ। 

वानखडे स्टेडियममा जितको लागि पाएको १२६ रनको लक्ष्य राजस्थानले १५.३ ओभरमा ४ विकेट गुमाउँदै पूरा गर्‍यो। रियान पराग ३९ बलमा ५ चौका र ३ छक्कासहित ५४ रनमा नटआउट रहे। यशस्वी जैसवाल १०, जस बटलर १४, सन्जु स्यामसन १३ र रविचन्द्रन आश्विन १६ रनमा आउट भए।

मुम्बइका आकाश मधवालले ३ तथा क्वेना मफकाले १ विकेट लिए।

त्यसअघि टस हारेर पहिला ब्याटिङको निम्तो पाएको मुम्बईले निर्धारित २० ओभरमा ९ विकेट गुमाउँदै १२५ रन बनाएको थियो।

कप्तान हार्दिकले सर्वाधिक ३४ रन बनाए। तिलक बर्मा ३२, इशान किशन १६ र टिम डेविड १७ रनमा आउट भए। 

राजस्थानमा ट्रेन्ट बोल्ट र युजभेन्द्र चहलले ३–३ तथा नाद्रे बर्गर २ र आवेश खानले १ विकेट लिए।

राजस्थान ३ खेलमा ६ अंकसहित शीर्ष स्थानमा छ।