सीप सिकेर उद्यमी बन्दै तमानखोलाका महिला

ढोरपाटन– बागलुङको तमानखोला गाउँपालिकाका महिला सामूहिक उद्यमबाट आत्मनिर्भर बन्ने प्रयासमा छन्। पालिकाका ६ वटै वडाका महिलाले सीप सिकेर लघुउद्यम सञ्चालन थालेका छन्। 

दुई वर्ष अगाडिसम्म घरधन्दामा सीमित उनीहरू अहिले कपडा उत्पादन, सिलाइ, साबुन उत्पादन, सिस्नोबाट पाउडर बनाउने, डालो र डोको बुन्नेलगायत काममा व्यस्त छन्। 

वडा नम्बर ३ तमान गाउँका महिलाले झोला, सल, सुइटर, टोपी बनाएका छन्। महिला कल्याण आमा समूहमा आबद्ध भएर उनीहरू उद्यममा लागेका हुन्। 

महिलाहरूलाई पालिकाले तालिम दिएर स्वरोजगार बन्ने बाटो देखाइदिएको हो। तालिमले आफूहरूको दैनिकी बदलिएको स्थानीय जुनुमाया घर्ती मगरले बताइन्। बिहान बेलुका घरको काम धन्दा गर्ने र दिउँसो कपडा बुन्ने गरेको उनले सुनाइन्। “एक्लैभन्दा समूहमा काम गर्दा फाइदा हुन्छ। अहिले गाउँका दिदीबहिनी मिलेर उद्यम गरेका छौँ,” उनले भनिन्, “हाम्रो आर्थिक अवस्थामा सुधार आएको छ। सेवाग्राहीको मागअनुसार उत्पादन पनि बढाएका छौँ।”

वडा नम्बर २ को लघुउद्यमी महिला समूहले झोला उत्पादन गर्दै आएको छ। वडा नम्बर ५ को खुङ्खानीका महिला समूहले सिस्नोको पाउडर, बोङगाखानी लघुउद्यम आमा समूहले भेडाको ऊनबाट काम्लो उत्पादन गरी बजारीकरण गर्दै आएको छ। वडा नम्बर १ को सिर्जनशील लघुउद्यमी समूहले साबुन सरफलगायत सामग्री उत्पादन गर्दै आएको छ। स्थानीय स्रोत साधनको प्रयोगबाट आफूहरू उद्यममा लागेको माया विकले बताइन्। विगतमा घाँस–दाउरा र पशुपालनमा व्यस्त उनी अहिले साबुन उत्पादनमा तल्लीन छिन्। 

महिलाले उत्पादन गरेका सामग्री प्रवर्द्धनका लागि गाउँपालिकाले सहयोग गर्दै आएको तमानखोला गाउँपालिकाका अध्यक्ष जोकलाल बुढामगरले बताए। गाउँपालिकाले वडा नम्बर ३ मा महिला उद्यमीका लागि भवनसमेत निर्माण गरेको छ। 

उनीहरूले उत्पादन गरेको खादा, दोसल्लालगायत सामग्री गाउँपालिकाले आयोजना गर्ने विभिन्न कार्यक्रममा प्रयोग हुने गरेको छ। अध्यक्ष बुढामगरले भने, “दिदीबहिनीलाई आत्मनिर्भर बनाउन  सीप सिकाउनेदेखि उद्यम गर्न सहयोग गर्दै आएका थियौँ। अब उहाँहरूले उत्पादन गरेका वस्तुलाई बजारीकरण गर्न पनि साथ दिन्छौँ।”