डोल्पामा आगलागीबाट ३ बालबालिका घाइते

डोल्पा– डोल्पाको त्रिपुरासुन्दरी नगरपालिका–४ स्थित सुँ सामुदायिक वनको डढेलोमा परेर तीन बालबालिका गम्भीर घाइते भएका छन्। गाउँनजिकैको वनमा लागेको डढेलोमा परेर बिहीबार एउटै घरका दाजुभाइसहित तीन बालबालिका घाइते भएका हुन्।

१२ वर्षीय विवश बुढा, १३ वर्षीय समन्त बुढा र १० वर्षीय सुरज बुढा घाइते भएको प्रमुख जिल्ला अधिकारी तुलसीप्रसाद दाहालले जानकारी दिए। दिउँसो वनमा गुच्ची च्याउ टिप्न गएको बेला उनीहरू आगोको चपेटामा परेका थिए।

घाइते तीनै जनालाई उपचारका लागि जिल्ला अस्पताल ल्याइएको छ। उनीहरूको डोल्पामा उपचार सम्भव नभएकाले काठमाडौँ लैजानुपर्ने जिल्ला अस्पतालले जनाएको छ। 

त्रिपुरासुन्दरी नगरपालिकाले अस्पताल लैजान हेलिकप्टरको व्यवस्थाका लागि पहल गरिरहेको प्रमुख प्रशासकीय अधिकृत जगदीशचन्द्र नेपालीले जानकारी दिए।

सुर्खेतबाट उद्धारका लागि नेपाली सेनाको हेलिकप्टर खराब मौसमका कारण डोल्पा आउन नसकेको उनले बताए।

डोल्पामै गत मंगलबार ठूलीभेरी नगरपालिका–४ स्थित मष्टा सामुदायिक वनमा आगो निभाउने क्रममा घाइते भएका चार सैनिकमध्ये तीन जनाको मृत्यु भएको थियो।