सोलुखुम्बुमा वनको डढेलो गाउँमा सल्किँदा १० घर जले

सोलुखुम्बु– हिमाली जिल्ला सोलुखुम्बुमा जंगलको डढेलो गाउँमा सल्किँदा १० घर जलेर नष्ट भएका छन्। आगोले एक दर्जन बढी गाई, भैँसीको गोठ जल्नुका साथै पशुचौपायासमेत मरेको जिल्ला प्रहरी कार्यालय सोलुखुम्बुले जनाएको छ।

जिल्लाको थुलुङ दूधकोशी गाउँपालिका–३ पञ्चनमा बुधबार भएको आगलागीबाट स्थानीय बुद्धिमाया चर्मकार, पूर्णबहादुर अधिकारी, कालीबहादुर अधिकारी, हस्तिमाया राई र पारसमणि राईको घर र गोठ जलेर नष्ट भएको जिल्ला प्रहरी कार्यालयका सूचना अधिकारी प्रहरी निरीक्षक रामचन्द्र साहले जानकारी दिए।

यस्तै बडीसुवा राई, उत्तरकुमार राई, दिलबहादुर राई, निशान राई र टीकाध्वज राईको घर पनि आगोले जलेको प्रहरी निरीक्षक साहले बताए। उनका अनुसार घटनामा दर्जनौँ गोठमा पनि आगो लागेको छ। घरपालुवा पशुचौपाया जलेर मरेका छन्। थुलुङ दूधकोशी गाउँपालिका–३ पञ्चनस्थित राष्ट्रिय वन क्षेत्रमा लागेको डढेलो हावाको वेगका कारण घरमा सल्किँदा बस्ती नै सखाप भएको प्रहरी नायब उपरीक्षक द्वारिकाप्रसाद घिमिरेले बताए। 

“वनमा फैलिएको डढेलो निभाउन प्रहरीसहित स्थानीय जनशक्ति सक्रिय थिए, एक्कासि आगो गाउँमा सल्कियो र गाउँ नै सखाप बनायो, त्यो आगो हावाले उडाएर ल्याएको झिल्कोबाट सल्किएको हुनुपर्छ,” उनले भने, “त्यहाँका अधिकांश घरमा खरको छानो भएकाले नियन्त्रणमा लिन समय लाग्यो।” गाउँमा सल्किएको आगो नेपाल प्रहरी, सशस्त्र प्रहरी,  स्थानीय, गाउँपालिकालगायतको सक्रियतामा नियन्त्रणमा लिन सफल भएको छ भने जंगलको डढेलो नियन्त्रण बाहिर रहेको छ।

घटनाको क्षतिको विवरण संकलन भइरहेको जिल्ला प्रहरी कार्यालय सोलुखुम्बुले जनाएको छ। आगोले सबै धनसम्पत्ति जलेर खरानी भएपछि पीडितहरू अर्धचेत अवस्थामा पुगेको जिल्ला समन्वय समिति सोलुखुम्बुका प्रमुख कृष्णप्रसाद निरौलाले बताए। “आगोले सबै नष्ट गरायो, भएभरका सबै गुमाएपछि अहिले यहाँका स्थानीयमा चेत छैन, पूरै गाउँ नै रुवाबासीमा परिणत भएको छ, बस्ती नै खरानी भयो, जंगलमा लागेको आगो नियन्त्रणमा आउन सकेको छैन, धुवाँ र धुलोले अझै आँखा हेर्न सक्ने अवस्था छैन,” समन्वय प्रमुख निरौलाले भने।

एकाबिहानै दुई घर र एक खोर जले, ६५ लाखको क्षति
जिल्लाको नेचासल्यान गाउँपालिका–२ डिटीमा बिहीबार बिहान दुई वटा घर र बाख्राको एउटा खोर जलेर नष्ट भएको छ। बिहान ४ः३० बजे डिटीका ज्ञानबहादुर खत्रीको दुई वटा घर र एउटा खोर जलेर नष्ट भएको जिल्ला प्रहरी कार्यालय सोलुखुम्बुले जनाएको छ। 

प्रहरी निरीक्षक रामचन्द्र साहका अनुसार आगलागीबाट ६५ लाख रुपैयाँ बराबरको क्षति भएको छ। ज्ञानबहादुरको दुई वटा घरमा भएको ५० हजार रुपैयाँ नगद, नौ तोला सुन, २० तोला चाँदी, २० मुरी अन्न, एक थान मोबाइल, लत्ताकपडा, भाँडावर्तनलगायत सबै सामग्री जलेर नष्ट हुँदा सो बराबरको क्षति भएको प्रहरी निरीक्षक साहले बताए। आगोले नजिकै रहेको बाख्राको खोरसमेत जल्दा एउटा बोका र एउटा बाख्रा जलेर मरेको  छ। आगलागीको कारण खुल्न सकेको छैन।