अमेरिकाको टेक्सासमा बाढी: ६०० भन्दा बढीको उद्धार

अमेरिकाको चौथो ठूलो शहर टेक्सासको ह्युस्टन वरपरको बाढीग्रस्त क्षेत्रबाट ६०० भन्दा बढी व्यक्तिको उद्धार गरिएको छ। 

ह्यारिस काउन्टीका न्यायाधीश लिना हिडाल्गोले एक पत्रकार सम्मेलनमा काउन्टीका विभिन्न क्षेत्रबाट १८० जना मानिस र १२२ घरपालुवा जनावरको उद्धार गरिएको बताइन्। 

स्थानीय मिडियाले पोल्क काउन्टीमा १०० जनाभन्दा बढी र मोन्टगोमेरी काउन्टीमा ४०० जनाको उद्धार गरेको बताएका छन्। 

बाढीको कारण जोखिम बढ्ने र थप वर्षाको पूर्वानुमान गरिएको छ। राष्ट्रिय मौसम सेवाले आइतबारसम्म अर्को चरणको भारी वर्षाको सम्भावना रहेको जनाएको छ। 

ह्युस्टनबाट ३० माइल (५० किलोमिटर) उत्तरपूर्वमा रहेको स्प्लेन्डोरा शहर नजिकै गत पाँच दिनमा २१ इन्च (५३ सेन्टिमिटर) भन्दा बढी पानी परेको मौसम सेवाले जनाएको छ ।

हिडाल्गोले सान ज्याकिन्टो नदीको पूर्वी फोर्कमा रहेको ह्युस्टन क्षेत्रका बस्तीलाई अनिवार्य खाली गर्न आदेश दिएकी छन्। त्यहाँका बासिन्दालाई सकेसम्म चाँडो आफ्नो घर छोड्न आग्रह गरिएको छ।  

ह्युस्टन शहरका अधिकारीले पछिल्लो चार महिनामा परेको पानी अहिले एक हप्तामा नै परेको जनाएका छन्। हालसम्म कसैको मृत्यु वा घाइतेको खबर आएको छैन।