जनकपुरधाममा हतियार देखाएर सहकारीका कर्मचारीबाट लुटियो ८० लाख

जनकपुरधाम– धनुषाको जनकपुरधामस्थित एक सहकारी संस्थाका कर्मचारीबाट ८० लाख रुपैयाँ लुटिएको छ। सोमबार दिउँसो शुभश्री बचत तथा ऋण सहकारी संस्था मैनाथपुरमा कार्यरत वीरेन्द्रकुमार महतोलाई हतियार देखाएर अज्ञात व्यक्तिले रकम लुटेका हुन्।

पेस्तोल देखाएर तीन जनाको समूहले महतोको साथमा रहेको ८० लाख रुपैयाँ लुटेको जिल्ला प्रहरी कार्यालय धनुषाका प्रहरी नायब उपरीक्षक रञ्जन आबाले जानकारी दिए।

उनका अनुसार महतो जनकपुरधामको भानुचोकमा रहेको राष्ट्रिय सहकारी बैंकबाट रकम झिकेर सहकारीतर्फ जाँदै थिए। सोही क्रममा जनकपुरधाम उपमहानगरपालिका–१९ मा महतोका साथमा रहेको रकम लुटिएको हो। जानकारी प्राप्त भएलगत्तै प्रहरी घटनास्थल पुगेर लुटेराको खोजी भइरहेको उनले बताए।