हुम्लामा खडेरी: खेतमै सुक्न थाले बाली

सिमकोट– हुम्ला खडेरीको चपेटामा परेको छ। खडेरीले बरगाउँ, ठेहे, लिमाटङ, तोर्पालगायत गाउँका खेतबारीमा पाक्न लागेको उवा, गहुँ सुकेको छ। 

लामो समयसम्म पानी नपर्दा बाली बिग्रेको सिमकोट गाउँपालिका–१, २, ३ र ४ का किसानले बताएका छन्। पानीको वैकल्पिक व्यवस्था नहुँदा उनीहरू कसरी अर्को बाली लगाउने र परिवारको भरणपोषण गर्ने भनेर चिन्तित भएका छन्।

हिउँदमा हिउँ नपर्दा अनिकाल हुने सिमकोट गाउँपालिका–३ का गाजीमा लामाले बताए। यस वर्ष हिउँ नपर्दा भोकमरीको अवस्था आएको उनको भनाइ छ। चैतमा कोदो र वैशाख पहिलो साता चिनो छर्नुपर्नेमा पानी नपर्दा किसानले खेती गर्न पाएका छैनन्। 

पानी नपर्दा खेतबारीमा लगाउने खुर्सानी, मकै, फर्सीलगायत अन्य तरकारी लगाउन नपाएको सिमकोट गाउँपालिका–२ ठेहेगाउँका किसान गौगोरा बोहराले बताए।

“१० वर्ष अगाडिसम्म यसरी खेतबारी सुक्खा हुँदैनथे तर यो हिउँदमा हिउँ र बर्खामा पानी नपर्दा समस्या भएको छ,” उनले भने।