भूकम्प प्रभावित क्षेत्रमा पुनर्निर्माणका लागि २१ अर्ब बजेट

काठमाडौँ– सरकारले जाजरकोट र रुकुम पश्चिमलगायतका जिल्लामा भूकम्पबाट क्षति पुगेका भौतिक संरचना पुनर्निर्माणका लागि २१ अर्ब ६० करोड रकम विनियोजन गरेको छ। 

मंगलबार संघीय संसद्को संयुक्त बैठकमा आर्थिक वर्ष २०८१/८२ को बजेट प्रस्तुत गर्दै अर्थमन्त्री वर्षमान पुनले भूकम्पबाट क्षतिग्रस्त निजी घरको सर्वेक्षण गरेर पुनर्निर्माणलाई तीव्रता दिइने बताए। 

“सामुदायिक विद्यालय भवन, स्वास्थ्य संस्था, सरकारी  तथा सार्वजनिक भवन लगायतका पूर्वाधारको शीघ्र पुनर्निर्माण गरिनेछ। भूकम्पपछिको पुनर्निर्माणका लागि २१ अर्ब ६० करोड रुपैयाँ विनियोजन गरेको छु,” उनले भने। 

विसं २०८० कात्तिक १७ गतेको भूकम्पले जाजरकोट र रुकुम पश्चिमलगायत जिल्लामा क्षति गरेको थियो। जाजरकोटलाई केन्द्रबिन्दु बनाएर गएको ६.४ म्याग्निट्यूड भूकम्पमा परी १५० जनाभन्दा बढीको मृत्यु भएको थियो। भूकम्प प्रभावित जिल्लामा अस्थायी आवास निर्माण जारी रहे पनि स्थायी आवास पुनर्निर्माणमा तीव्रता दिने बजेट वक्तव्यमा उल्लेख छ।