मकवानपुरको भीमफेदीमा कार दुर्घटना, ३ जनाको मृत्यु

मकवानपुर– मकवानपुरको भीमफेदी गाउँपालिका–६ जुरीखेतमा बुधबार साँझ भएको कार दुर्घटनामा तीन जनाको मृत्यु भएको छ। दुई जना घाइते भएका छन्। 

जिल्ला प्रहरी कार्यालय मकवानपुरका डीएसपी लक्ष्मी भण्डारीका अनुसार भीमफेदी–कुलेखानी–काठमाडौँ सडकखण्डमा काठमाडौँबाट हेटौँडा आउँदै गरेको बा६च ९३७९ नम्बरको कार अनियन्त्रित भएर सडकबाट २५० मिटर तल खसेको थियो। 

कारमा रहेका पाँच जनामध्ये एक जनाको घटनास्थलमा नै र दुई जनाको हेटौँडास्थित मकवानपुर सहकारी अस्पतालमा उपचारका क्रममा मृत्यु भएको हो।

मृत्यु हुनेमा मनहरी गाउँपालिका–८ बेलुवाका २६ वर्षीय अर्जुन नेपाली र उनका तीन महिने छोरी अर्जिता रहेका छन्। मृतक अर्का एक जनाको सनाखत हुन बाँकी छ । 

दुर्घटनामा घाइते मनहरी–८ बेलुवाका २३ वर्षीया सरिता परियार र चितवनको राप्ती नगरपालिका–१ लोथरका ३५ वर्षीया सानुकान्छी तामाङको मकवानपुर सहकारी अस्पतालमा उपचार भइरहेको प्रहरीले जनाएको छ।