सीटीईभीटीको ल्याबबाट क्रिप्टो कारोबार, २ जना पक्राउ

काठमाडौँ– प्राविधिक शिक्षा तथा व्यावसायिक तालिम परिषद् (सीटीईभीटी)को ल्याबमा क्रिप्टोसम्बन्धीको कारोबार भएको पाइएको छ। ल्याबमा रहेका कम्प्युटरमा क्रिप्टो कारोबार भएको पाइएपछि त्यहाँ काम गर्ने दुई जनालाई प्रहरीको केन्द्रीय अनुसन्धान ब्युरो (सीआईबी)ले पक्राउ गरेको छ।

उक्त आरोपमा कीर्तिपुर बस्ने ४० वर्षका विश्वास गुरुङ र भक्तपुरका राजेन्द्र ताहामतालाई पक्राउ गरेको ब्युरोले जनाएको छ। सीटीईभीटीको प्राविधिक प्रशिक्षण भवन ठिमीको सूचना प्रविधि ल्याबमा क्रिप्टोसम्बन्धी गैरकानूनी कार्य सञ्चालन भइरहेको भन्ने सूचनाका आधारमा ब्युरोले अनुसन्धान थालेको थियो।

ब्युरोबाट खटिएको प्रहरी टोलीले त्यहाँका कम्प्युटर तथा सर्भर प्रणालीको प्रारम्भिक प्राविधिक अनुसन्धान र विश्लेषण गर्दा एउटा सर्भर र ६४ वटा डेस्कटप कम्प्युटरमा क्रिप्टो मिनिङ एप्लिकेसन सञ्चालन भएको पाइएको ब्युरोका प्रवक्ता, प्रहरी उपरीक्षक होविन्द्र बोगटीले बताए।

उक्त कम्प्युटर बरामद गरी उल्लिखित ल्याबको जिम्मेवारीमा रहेका उनीहरूलाई ठिमीबाट पक्राउ गरी मुद्रासम्बन्धी कसुरमा भक्तपुर जिल्ला अदालतबाट ६ दिनको म्याद लिएर अनुसन्धान गरिरहेको प्रहरीले जनाएको छ।