दक्षिणी गाजामा ‘रणनीतिक विराम’ गर्ने इजरायली सेनाको घोषणा

इजरायली सेनाले दक्षिणी गाजापट्टीको भागमा दिनको समयमा सैन्य गतिविधिको ‘रणनीतिक विराम’ लागू गर्ने घोषणा गरेको छ। 

संयुक्त राष्ट्र संघ र अन्य संस्थासँगको छलफलपछि गाजापट्टीमा प्रवेश गर्ने मानवीय सहायताको मात्रा बढाउने प्रयासस्वरुप यस्तो निर्णय लिइएको इजरायली सेनाले जनाएको छ। 

“केरम सालोम सीमा पार गर्ने सालाह अल–दिन रोड र त्यसपछि उत्तरतर्फ जाने सडकमा अर्को सूचना नआएसम्मका लागि मानवीय सहायता पहुँच उद्देश्यका लागि हरेक दिन बिहान ८ देखि साँझ ७ बजेसम्म सैन्य गतिविधिको रणनीतिक विराम हुनेछ,” सेनाले आइतबार एक विज्ञप्तिमार्फत भनेको छ।

इजरायलले लामो समयदेखि केरेम शालोम सीमामार्फत सहायता वितरण सहज बनाउने प्रयासमा हस्तक्षेप गर्दै आएको छ। मानव अधिकारवादी समूहहरूले महिनौँसम्म घेराबन्दी गरिएको प्यालेस्टिनी क्षेत्रमा खाना र अन्य आवश्यक वस्तुको अभाव रहेको जनाएका छन्। 

 “गाजापट्टीभित्र द्वन्द्वका कारण मानिसको बढ्दो माग पूरा गर्ने स्तरको सहायता प्रदान गर्न असम्भव हुँदै गइरहेको छ,” विश्व खाद्य कार्यक्रमका उपकार्यकारी निर्देशक कार्ल स्काउले भने। 

विश्व स्वास्थ्य संघठनका अनुसार गाजामा पाँच वर्ष मुनिका आठ हजारभन्दा बढी बालबालिकाको तीव्र कुपोषणको उपचार गरिएको छ। 

अन्तर्राष्ट्रिय मध्यस्थकर्ताले इजरायल र हमासलाई अमेरिकी राष्ट्रपति जो बाइडेनको बन्धक–कैदी आदानप्रदान र सहायता वितरण युद्धविराम सम्झौताको प्रस्तावमा सहमत हुन दबाब दिइरहेका छन्।