सिंहदरबार प्रवेशका लागि साउनदेखि ‘ई–गेटपास’

अस्थायी पास दुरुपयोग भएका गुनासा बढेपछि ती पास खारेज गरेर क्यूआर कोडसहितको प्रवेशपास प्रयोगमा ल्याइने गृह मन्त्रालयले जनाएको छ।

उकालो

बुधबार, १२ असार, २०८१

सिंहदरबार प्रवेशका लागि साउनदेखि ‘ई–गेटपास’

काठमाडौँ– प्रशासनिक केन्द्र सिंहदरबार प्रवेशका लागि आउँदो साउनदेखि ‘ई–गेटपास’ प्रणाली प्रयोगमा ल्याइने भएको छ।

यही असार ६ गते बसेको सचिवस्तरीय बैठकले मन्त्रालयबाट जारी गरिएका सबै अस्थायी पास खारेज गरेर साउन १ गतेदेखि ‘ई–गेटपास’ प्रणाली प्रयोगमा ल्याउने तथा गृह मन्त्रालयले आवश्यक समन्वय गर्ने निर्णय गरेको मन्त्रालयका सहसचिव एवं प्रवक्ता नारायणप्रसाद भट्टराईले जानकारी दिए।

“साउनदेखि सिंहदरबार प्रवेशका लागि विभिन्न मन्त्रालयबाट जारी गरिएका सबै अस्थायी पास खारेज हुनेछन्, कसले पास लिए त्यसको रेकर्ड पनि रहने भएकाले अब ई–गेटपास प्रणाली प्रयोगमा ल्याइनेछ,” उनले भने।

विगतमा विभिन्न मन्त्रालयबाट जारी गरिएका अस्थायी पास दुरुपयोग भएका गुनासा बढेपछि अहिले ती पास खारेज गर्न लागिएको जानकारी दिँदै प्रवक्ता भट्टराईले क्यूआर कोडसहितको प्रवेशपास प्रयोगमा ल्याइने बताए।

‘सिंहदरबार पास’ वेबसाइटमा गएर अकाउन्ट बनाई युजर आईडी र पासवर्ड राखेर अनलाइनबाट अनुरोध गर्ने तथा गेटपास पाउन आधारभूत विवरण भर्नुपर्ने प्रणाली बनाइएको मन्त्रालयले जनाएको छ ।

प्रतिक्रिया दिनुहोस !