राष्ट्रपतीय निर्वाचनअघि बाइडेन र ट्रम्पबीच पहिलो बहस

आगामी नोभेम्बर ५ मा हुने अमेरिकी राष्ट्रपतीय निर्वाचनका लागि हालका राष्ट्रपति तथा डेमोक्रेटिक पार्टीका उम्मेदवार जो बाइडेन र पूर्वराष्ट्रपति तथा रिपब्लिकन पार्टीका उम्मेदवार डोनाल्ड ट्रम्पबीच पहिलो बहस भएको छ ।

नेपाली समयानुसार शुक्रबार बिहान सीएनएनबाट उक्त बहस प्रत्यक्ष प्रसारण भएको थियो। एक घण्टा ३० मिनेट चल्ने भनिएको बहस १० मिनेट ढिलो सकिएको थियो। बहसमा दुईबीच एकापसमा थुप्रै विषयमा आरोप–प्रत्यारोप चल्यो । बाइडेनले ८१ वर्षको उमेरमा आफू पुन: अमेरिकाको राष्ट्रपति बन्न र देशलाई चुनौतिबाट बाहिर निकाल्न सक्षम भन्दै मतदातालाई विश्वास दिलाउन खोजेका छन् । साथै ७८ वर्षीय ट्रम्पले यो अवसरलाई जनतालाई विश्वास दिलाएर फेरि एक पटक ह्वाइटहाउस जानका लागि प्रयोग गरेका छन्।  

दुई नेताबीचको बहस एटलान्टास्थित सीएनएनको मुख्यालयमा भएको हो। ट्रम्प र बाइडेनले आफ्नो प्रारम्भिक कुराकानीमा अर्थतन्त्रको बारेमा बहस गरे। उनीहरूले मुद्रास्फीति, रोजगारी र कर नीतिमा एक–अर्कालाई आक्रमण गरेका थिए।

बहसको पहिलो आधा घण्टामा बाइडेन अलिकति नर्भस देखिन्थे। ट्रम्प उर्जाले भरिपूर्ण थिए तर उनले आफ्नो जवाफमा झूटको सहारा पनि लिए। ट्रम्पले क्यापिटलमा भएको दंगामा कुनै पनि भूमिकालाई अस्वीकार गरेका छन् र दंगामा दोषी ठहरिएका व्यक्तिहरूको आचरणलाई खतरनाक रूपमा स्वीकार गर्न अस्वीकार गरेका छन्।

बाइडेनले क्यापिटल हिल दंगाका लागि ट्रम्पलाई दोष दिए र यो व्यक्ति (ट्रम्प) दोषी रहेको बताए। जवाफमा ट्रम्पले बाइडेनको छोरा अपराधी भएको बताए। छलफल शुरू हुँदा दुवै नेताले मञ्चमा एकअर्कासँग हात मिलाएका थिएनन्। यसबाट दुई नेताबीचको तनावको अनुमान गर्न सकिन्थ्यो। यसपछि मात्रै ट्रम्पले मुद्रास्फीतिको मुद्दामा बाइडेन सरकारको आलोचना गर्दै मुद्रास्फीतिले अमेरिकालाई मारेको बताए।

ट्रम्पले अफगानिस्तानबाट सेना फिर्ता गर्ने निर्णयको पनि आलोचना गरे। उनले अफगानिस्तानबाट सेना फिर्ता भएको दिन इतिहासको सबैभन्दा लाजमर्दो दिन भएको बताए।

ट्रम्पले आफू राष्ट्रपति निर्वाचित भएमा गर्भपतन चक्कीमा प्रतिबन्ध नलगाउने बताएका छन्। बाइडेनले ट्रम्पको निर्णयको आलोचना गरेका थिए।

बाइडेनले ट्रम्पको अध्यागमन नीतिको आलोचना गर्दै ट्रम्पको प्रशासनमा बालबालिकालाई आमाबाट अलग्गिएको र परिवारलाई अलग गरिएको बताए। बाइडेनले एक वयस्क स्टारसँग ट्रम्पको सम्बन्धमा पनि खोट लगाए।

तर ट्रम्पले उनीविरुद्धको आरोप अस्वीकार गरे र डेमोक्र्याटिक अभियोजकहरूले यस मामलामा उनको छवि बिगार्ने प्रयास गरेको आरोप लगाए।