बागलुङ र हुम्लामा उत्कृष्ट कृषक पुरस्कृत

काठमाडाैँ– बागलुङ र हुम्लामा उत्कृष्ट कृषकहरूलाई सम्मान तथा पुरस्कृत गरिएको छ। 

२१औँ राष्ट्रिय धान दिवस तथा रोपाइँ महोत्सवका अवसरमा बागलुङका चार र हुम्लाका तीन कृषक आ–आफ्नो जिल्लामा पुरस्कृत भएका हुन्। सुन्तला खेतीतर्फ बागलुङ नगरपालिका–८ सिगानाका कृषक अनन्तबहादुर खड्का, तरकारी खेतीतर्फ बागलुङ नगरपालिका–९ तित्याङका पदमबहादुर खत्री, स्याउ र आलु खेतीतर्फ ढोरपाटन–९ स्थित उत्तरगंगा अर्गानिक एग्रोका चिरनकुमार घर्ती र  बागलुङ नगरपालिका–१२ स्थित कालीगण्डकी दूग्ध उत्पादक सहकारीका कृष्णप्रसाद लाछिानेलाई सम्मान गरिएको कृषि ज्ञान केन्द्र बागलुङका प्रमुख राजेश्वर सिलवालले जानकारी दिए। उनीहरूलाई नगद १०/१० हजार रुपैयाँ पुरस्कारसहित सम्मान गरिएको ज्ञान केन्द्रले जनाएको छ।

यस्तै, कर्णाली प्रदेश मुख्यमन्त्री उत्कृष्ट कृषक कार्यक्रमअन्तर्गत तीन जना कृषकलाई पुरस्कृत गरिएको छ। नाम्खा गाउँपालिका–१ लामु तामाङ, चङ्खेली गाउँपालिकाका गोविन्द जैसी र छिरिङ लामालाई नगदसहित सम्मान गरिएको हो। तामाङलाई ४० हजार, जैसीलाई ३० हजार तथा छिरिङलाई २० हजार रुपैयाँ नगद र प्रमाणपत्रसहित सम्मान गरिएको नाम्खा गाउँपालिकाका अध्यक्ष प्रेमबहादुर लामाले जानकारी दिए।

तरकारी, फलफूल र दूधलगायत उत्पादनको बजारीकरणमा सरकारले ध्यान दिनुपर्ने पुरस्कृति कृषकहरुको भनाइ छ।