बागमती, गण्डकी र लुम्बिनीमा 'धेरै भारी' वर्षाको सम्भावना

काठमाडाैँ–  जल तथा माैसम विज्ञान विभागका अनुसार अहिले देशका धेरैजसो भागमा वर्षा भइरहेको छ। कोशी, मधेश, बागमती  र गण्डकी प्रदेशका केही स्थानहरूमा, लुम्बिनी प्रदेशका थोरै स्थानहरूमा तथा बाँकी प्रदेशका एक/दुई स्थानमा मेघगर्जन र चट्याङसहित हल्कादेखि मध्यम वर्षा भइरहेको विभागअन्तर्गत माैसम पूर्वानुमान महाशाखाले जनाएको छ।

मंगलबार दिउँसो देशभर साधारणदेखि पूर्णतया बदली रहने छ। महाशाखाका अनुसार देशभरका धेरै स्थानहरूमा मेघगर्जन र चट्याङसहित हल्कादेखि मध्यम वर्षाको सम्भावना रहेको छ। बागमती, गण्डकी र लुम्बिनी प्रदेशका एक/दुई  स्थानमा धेरै भारी वर्षाको पनि सम्भावना रहेको महाशाखाले जनाएको छ। साथै कर्णाली र सुदूरपश्चिम प्रदेशका थोरै स्थानहरूमा तथा कोशी र मधेश प्रदेशका एक/दुई स्थानमा भारी वर्षाको सम्भावना रहेको छ।

राति पनि देशका धेरै स्थानहरूमा मेघगर्जन र चट्याङसहित हल्कादेखि मध्यम वर्षाको सम्भावना रहेको छ। गण्डकी र लुम्बिनी प्रदेशका एक/दुई स्थानमा धेरै भारी वर्षाको  पनि सम्भावना रहेको माैसम पूर्वानुमान गरिएको छ।

बागमती, गण्डकी र लुम्बिनी  प्रदेशका एक/दुई  स्थानमा धेरै भारी वर्षाको सम्भावना रहेकोले ती क्षेत्रमा हुन सक्ने गेग्रान बहाव, बाढी, पहिरो तथा भू–क्षयका जस्ता प्रकोपको जोखिम वा क्षतिबाट बच्न आवश्यक सतर्कता अपनाउन पनि महाशाखाको आग्रह छ।