किसान र उपभोक्तालाई जोड्दै कृषि ‘एम्बुलेन्स’

गण्डकी– पोखरा महानगरपालिकाले सञ्चालनमा ल्याएको कृषि एम्बुलेन्सले किसान र उपभोक्ता बीचमा सेतुको काम गरेको छ।

एम्बुलेन्सले महानगरका ग्रामीण बस्तीमा भएका उत्पादनको सहज बजारीकरण गर्न सहयोग पुर्‍याएको छ। ३६ लाख रुपैयाँमा खरिद गरिएको कृषि एम्बुलेन्सले गत वर्ष वैशाख ५ गतेदेखि सेवा शुरूआत गरेको थियो। 

महानगरका कृषि महाशाखा प्रमुख मनोहर कडरियाका अनुसार कृषि एम्बुलेन्समार्फत हाल वडा नं २२ पुम्दी भुम्दी, वडा नं २३ चापाकोट, घाँटीछिना, वडा नं २८ माझठाना, वडा नं ३३ भरतपोखरीको बागमारा, वडा नं २५ झिर्झिकालगायत स्थानबाट कृषिजन्य उत्पादन निःशुल्क ढुवानी भइरहेको छ।

मागअनुसार कृषि एम्बुलेन्सलाई विभिन्न ठाउँमा पुर्‍याउने गरिएको जनाउँदै ग्रामीण क्षेत्रबाट ल्याइएका कृषिजन्य उत्पादन बारअनुसार फरक–फरक ठाउँमा लगेर बिक्रीवितरण गर्ने गरिएको उनले बताए। कृषि उपज आइतबार पोखरा–३ नदीपुर, मंगलबार वडा नं ७ स्थित मुनाबजार, बुधबार मुस्ताङचोकस्थित लोकसेवा आयोग कार्यालय अगाडि, बिहीबार सिद्धार्थ चोकस्थित श्री कम्लेक्स, शुक्रबार वडा नं ४ गैरापाटनस्थित वडा कार्यालय अगाडि र शनिबार मुस्ताङचोकस्थित लोकसेवा आयोगको कार्यालय अगाडि बिक्री वितरण गर्ने गरिएको छ।

गाउँबाट आएको ताजा तरकारीमा सर्वसाधारणको आकर्षण बढिरहेको छ। किसानबाट ल्याइएको उत्पादन उनीहरूसँग खरिद गरेको मूल्यको २० प्रतिशतभन्दा बढी नबढ्ने गरी उपभोक्ताले खरिद गर्न पाउने व्यवस्था मिलाइएको महानगरले जनाएको छ। 

पछिल्लो समयमा कृषि एम्बुलेन्सको ठाउँ–ठाउँबाट माग बढ्दै गएको जनाउँदै प्रमुख कडरियाले नियमित गाडीको पहुँच नभएका साना किसानका साथै उपभोक्ता दुवैका लागि प्रभावकारी भएको बताए।