पहिराले मुग्लिन–मलेखु सडक अवरुद्ध

काठमाडौँ– अविरल वर्षासँगै पहिरो खसेपछि पृथ्वी राजमार्गअन्तर्गत मुग्लिन–मलेखु सडकखण्ड अवरुद्ध बनेको छ।  

इलाका प्रहरी कार्यालय मुग्लिनका प्रहरी निरीक्षक निरला भण्डारीका अनुसार चितवनको इच्छाकामना–४ घोप्टेभीर र वडा नम्बर ३ फिस्लिङ र मौवाखोलाको बीचमा पहिरो खस्दा सडक दुईतर्फी अवरुद्ध बनेको हो। 

“अहिले पहिरो पन्छाउने काम भइरहेको छ,” उनले भने। प्रहरी निरीक्षक भण्डारीले चुम्लिङटारमा खसेको पहिरो पन्छाइसकेको बताए। 

बाढीले कल्भर्ड बगाउँदा पृथ्वीराजमार्गमा यातायात ठप्प
पृथ्वीराजमार्गअन्तर्गत तनहुँको शुक्लागण्डकी–७ शेराटारमा रहेको अस्थायी कल्भर्ड बाढीले बगाएपछि सवारी आवतजावत पूर्ण रूपमा बन्द भएको छ। शुक्रबार रातिदेखि परेको अविरल वर्षाका कारण खोलामा आएको बाढीले कल्भर्ड बगाउँदा राजमार्ग भएर गुड्ने सयौँ सवारीसाधन ठप्प भएका छन्। 

सूचनाको जानकारी पाएलगत्तै घटनास्थलतर्फ प्रहरी टोली पठाइएको जिल्ला प्रहरी कार्यालयका प्रहरी नायब उपरीक्षक दीपककुमार रायले बताए। “कल्भर्ड बगाएपछि राजमार्गमा सवारीसाधन सञ्चालन गर्न समय लाग्ने देखिएको छ,” उनले भने।

म्याग्दे गाउँपालिका–६ मौरी ओडारमा शनिबार पहिरो खस्दा सडक अवरुद्ध भएको छ। वर्षासँगै पहिरो खसिरहेकाले पानी नरोकिएसम्म पहिरो पन्छाउन कठिनाइ देखिएको उपरीक्षक रायले जानकारी दिए। “सडक माथिबाट निरन्तर पहिरो खसिरहेकाले पन्छाउन समस्या भइरहेको छ। पानी पर्न रोकिएपछि पहिरो पन्छाउने छौँ,” उनले भने।

पृथ्वीराजमार्गको अन्य क्षेत्रमा पहिरो खस्दा अवरोध भएका सडक पहिरो पन्छाएर सञ्चालन गरिएको प्रहरीले जनाएको छ। शुक्रबार रातिदेखि अविरल वर्षा भइरहेकाले राजमार्ग हुँदै यात्रा गर्ने सवारीचालक र सर्वसाधारणलाई सतर्कता अपनाउन प्रहरीले अनुरोध गरेको छ।