कोशी ब्यारेजका सबै ढोका खोलिए, सतर्कता अपनाउन आग्रह

धरान– पूर्वी पहाडी भेगमा निरन्तर वर्षा भएसँगै सप्तकोसी नदीको जलसतह बढेको छ। जलसतहमा भएको वृद्धिलाई दृष्टिगत गरी स्थानीय प्रशासनले कोशी ब्यारेजका सबै ५६ वटा ढोका खोलेको छ। 

प्रमुख जिल्ला अधिकारी रामचन्द्र तिवारीका अनुसार ब्यारेजमा प्रतिघण्टा तीन लाख ६८ हजार क्युसेकभन्दा बढी पानी प्रवाह भएपछि सबै ढोका खोलिएका हुन्।

नदीमा निरन्तर जलस्तर अनुगमन भइरहेको छ। पानीको सतह बढेपछि कोशी ब्यारेजमा जोखिमको संकेत दिन रातो बत्ती बालिएको छ भने राता झण्डा फहराइएका छन्।

सप्तकोसी जलमापन केन्द्रले जलसतह जोखिम विन्दुभन्दा माथि पुगेको बताएको छ। नदीको भेल उदयपुर र सुनसरीका केही क्षेत्रमा पस्ने जोखिम बढेको छ।

तटीय क्षेत्रका बासिन्दालाई सतर्कता अपनाउन प्रमुख अधिकारी तिवारीले आग्रह गरेका छन्।