गाजायुद्ध १०औँ महिनामा, प्यालेस्टिनी भूमिमा ३८ हजारभन्दा बढीको मृत्यु

हमासले दक्षिणी इजरायलमा गत वर्षको अक्टोबर ७ मा गरेको हमलाको बदलामा इजरायलले गाजामा युद्ध सुरू गरेको आइतबार १०औँ महिना शुरू भएको छ।

यो अवधिमा प्यालेस्टिनी भूमिमा ३८ हजारभन्दा बढी व्यक्तिको मृत्यु भएको छ भने हजारौँ घाइते भएका छन्। युद्धका कारण लाखौँ मानिस विस्थापित भएका छन्।

हमासले अक्टोबर ८ मा गरेको आक्रमणमा करिब एक हजार २०० जनाको मृत्यु भएको थियो भने लडाकु समूहले २५० जना बन्धक बनाएको थियो। युद्धविराम र कैदी आदानप्रदान सम्झौतापछि हमासले १०० भन्दा बढी व्यक्तिलाई रिहा गरेका थिए भने यसको तेब्बर संख्यामा प्यालेस्टिनी बन्दी रिहा भएका थिए।

हिंसा रोक्नको लागि नयाँ कूटनीतिक प्रयासहरू जारी छन्। इजरायलले कतारको दोहामा हालै शुरू भएको युद्धविराम वार्तालाई निरन्तरता दिन आगामी दिनमा एक प्रतिनिधिमण्डल पठाउने बताएको छ।

इजरायली प्रधानमन्त्री बेन्जामिन नेतन्याहूका प्रवक्ताले युद्धविराम र बन्धक मुक्त गर्ने सम्झौता कसरी गर्ने भन्ने विषयमा हमाससँग सहमति हुन बाँकी रहेको बताएका छन्।