अफगानिस्तानमा वर्षा र असिनाका कारण ३५ जनाको मृत्यु, २३० घाइते

अफगानिस्तानको जलालाबाद शहर र नंगरहार प्रान्तको छेउछाउका क्षेत्रमा परेको भारी वर्षा र असिनाको कारण कम्तीमा ३५ जनाको मृत्यु भएको छ। अन्य २३० जना घाइते भएको खामा प्रेसले जनाएको छ।

नंगरहारको सूचना तथा संस्कृति विभागले घटनामा नंगरहारका विभिन्न जिल्लामा मानिसहरूको मृत्यु भएको पुष्टि गरेको छ। विभागको रिपोर्ट अनुसार मृतक तथा घाइतेलाई उद्धार गरी केन्द्रीय  तथा प्रान्तीय अस्पतालमा लगिएको छ।

प्रारम्भिक रिपोर्टहरूले लगभग ४०० घरहरू ध्वस्त भएको संकेत गरेका छन्, जसले बासिन्दा र व्यवसायलाई आर्थिक क्षति पुर्‍याएको छ। यद्यपि, स्थानीय अधिकारीहरूले तथ्यांक अझ बढ्न सक्ने बताएको खामा प्रेसले जनाएको छ।

प्राकृतिक प्रकोपपछि, प्रभावित समुदायमा तत्काल प्रभाव कम गरी उनीहरूको पुनः स्थापनाका लागि आवश्यक सहयोग प्रदान गर्ने कार्य भइरहेको छ। प्रभावित परिवार तथा समुदायको समर्थनमा जोड दिँदै अधिकारीहरूले उद्धार र पुनः प्राप्ति प्रयास जारी राखेका छन्।