देशका अधिकांश स्थानमा मेघ गर्जनसहित वर्षाको सम्भावना

काठमाडौँ– देशभर मनसुनी वायुको प्रभाव रहेको छ। मनसुनको न्यूनचापीय रेखा सरदर स्थानको आसपास अवस्थित रहेकाले कोशी र लुम्बिनी केही तथा बाँकी प्रदेशका थोरै स्थानमा हल्कादेखि मध्यम वर्षा भइरहेको छ।

मौसम पूर्वानुमान महाशाखाका अनुसार दिउँसो देशभर आंशिकदेखि साधारणतया बदली रहनेछ। कोशी, बागमती, गण्डकी, लुम्बिनी र सुदूरपश्चिमका केही तथा मधेश र कर्णालीका थोरै स्थानमा मेघगर्जन र चट्याङसहित हल्कादेखि मध्यम वर्षाको सम्भावना छ। 

गण्डकी, लुम्बिनी र सुदूरपश्चिमका एक-दुई स्थानमा भारी तथा कोशी प्रदेशका एक-दुई  स्थानमा धेरै भारी वर्षा हुनेछ। यसैगरी, राति देशभर आंशिकदेखि साधारणतया बदली रहनेछ। 

कोशी, बागमती, गण्डकीका केही तथा बाँकी प्रदेशका थोरै स्थानमा मेघगर्जन र चट्याङसहित हल्कादेखि मध्यम वर्षा हुनेछ। कोशी र गण्डकी एक-दुई स्थानमा भारी वर्षा हुने महाशाखाले जनाएको छ।