बाँझो जग्गा सदुपयोग गर्न फलफूल खेती गर्दै भोजपुरका कृषक

भोजपुर– बाँझो जग्गा सदुपयोग गर्दै भोजपुरका कृषक फलफूल खेतीमा जुट्न थालेका छन्। वषौँदेखि बाझिएका खेतीयोग्य जमिनमा लगाएको फलफूल खेतीबाट पर्याप्त आम्दानी हुन थालेपछि कृषक उत्साहित भएका छन्।

ड्रागन फ्रुटको माग बढेसँगै भोजपुर नगरपालिका–१२ टक्सारको पिप्लेमा बाँझो रहेको एक सयभन्दा बढी रोपनी जग्गा भाडामा लिई ‘भोजपुर ड्रागन फ्रुट कम्पनी’ले व्यावसायिक रूपमा खेती गरेको छ। झन्डै ५० रोपनी जग्गामा अहिले ड्रागन फ्रुटको खेती गरिएको छ। ड्रागन फ्रुटका आठ हजार बिरुवा रोपिएको सञ्चालक एक्सन राईले बताए। यस वर्ष आठ लाखदेखि १० लाखप रुपैयाँसम्म आम्दानी हुने उनको अनुमान छ। 

यस्तै, टेम्केमैयुङ गाउँपालिका–८ सल्लेनीमा ४२ रोपनी जग्गामा कृषक शम्भु नेपालले ड्रागन फ्रुट र कागती खेती गर्दै आएका छन्। बाँझो जमिनमा चार वर्षअघि ‘दानाबोटे फलफूल तथा कृषि फर्म’ दर्ता गरी कृषि कर्म शुरू गरेको उनले बताए। नेपालले हाल वार्षिक सात लाख रुपैयाँसम्म आम्दानी गर्दै आएका छन्।

सिँचाइ अभाव, बसाइँसराइलगायत कारण बाझिएको जग्गामा लगाइएको ड्रागन फ्रुट, एभोकाडो, कागती, टिमुर र किवीबाट वार्षिक मनग्य आम्दानी लिन थालेको कृषक कमल भुजेल बताउँछन्। जिल्लाको पूर्वीपौवादुङ्मा गाउँपालिकाको छोकिमालामा विगत पाँच वर्षदेखि बाझिएको ३० रोपनी जग्गामा तीन वर्ष अघि कृषक भुजेलले टिमुर, एभोकाडोलगायतको खेती गर्दै आएका छन्।

गाउँघरमा रहेका बाँझो जग्गाको सही सदुपयोग गर्न सकिएमा यसले वैदेशिक रोजगारीमा जाने युवाको ध्यानसमेत तान्ने स्थानीय इन्द्र थापाले बताए। अर्का कृषक हरि गौतमले पछिल्लो समयमा देखिएको कृषकमा फलफूल मोहले बाझिएको जग्गाको सदुपयोग मात्र नभएर आम्दानीसमेत भइरहेको बताए। यस्ता कृषकलाई स्थानीय, प्रदेश र संघीय सरकारले प्रोत्साहन हुने गरी कार्यक्रम ल्याउन जरुरी रहेको उनको भनाइ छ।