एयर डाइनेस्टीको हेलिकप्टर दुर्घटना, ५ शव भेटिए

काठमाडौँ– काठमाडाैँबाट रसुवाको स्याफ्रुबेंसी उडेको एयर डाइनेस्टीको नाइन एन-एजेडी हेलिकप्टर नुवाकोटमा दुर्घटनामा परेको छ।

जिल्ला प्रहरी कार्यालय नुवाकोटका सूचना अधिकारी डीएसपी तीलक भारतीकाअनुसार शिवपुरी गाउँपालिका–७ स्थित शिवपुरी जंगलको सूर्यचाैरमा दिउँसो १:५४ बजे हेलिकप्टर दुर्घटनामा परेको हो। अहिलेसमम्म एक महिलासहित पाँच जनाको शव भेटिएको उनले जानकारी दिए।

"अहिलेसम्म घटनास्थलमा पाँच शव भेटिएको जानकारी आएको छ, १ जना महिला भन्ने खबर छ," उनले भने। तीमध्ये चार जना चिनियाँ नागरिक रहेको उनको भनाइ छ। नेपाल नागरिक उड्डयन प्राधिकरणका अनुसार चार जना चिनियाँ नागरिक बोकेर उडेको हेलिकप्टर ३ मिनेटमै सम्पर्क विच्छेद भएको थियो।

सूर्यचाैर क्षेत्रमा आगो बलेको र धुँवा देखिएपछि स्थानीयले हेलिकप्टर दुर्घटना भएको हुनसक्ने आशंका गरी प्रहरीलाई खबर गरेको सूचना प्राप्त भएको जिल्ला प्रशासन कार्यालय नुवाकोटका सहायक प्रमुख जिल्ला अधिकारी कृष्णप्रसाद हुमागाईले जानकारी दिए।