विद्यार्थीलाई डेंगी संक्रमण भएपछि २ विद्यालय बन्द

तनहुँ– तनहुँको आँबुखैरेनी गाउँपालिकास्थित दुई निजी विद्यालयका विद्यार्थी डेंगी संक्रमणले बिरामी हुन थालेपछि बुधबारदेखि ती विद्यालय बन्द गरिएका छन्।

आँबुखैरेनी गाउँपालिका–३ स्थित मर्स्याङ्दी बालज्योति बोर्डिङ स्कुल र बालशिक्षा सदन बोर्डिङ स्कुलका केही विद्यार्थीमा डेंगी संक्रमण देखिएपछि केही दिनका लागि विद्यालय बन्द गरिएको हो।

विद्यार्थीमा ज्वरो आउने समस्यापछि परीक्षण गर्दा डेंगी संक्रमण पुष्टि भएको र यस क्षेत्रमा केही दिन संक्रमण फैलिइरहेकाले विद्यालय बन्द गराइएको गाउँपालिकाका शिक्षा शाखा प्रमुख निर्मला कुँवरले जानकारी दिनुभयो। उनले भने, “अन्य विद्यालयले विद्यार्थीको बिरामीको अवस्थाअनुसार बिरामी संख्या वृद्धि भएको खण्डमा विद्यालय बन्द गर्न निर्देशन दिइएको छ। डेंगी रोगको रोकथाम र नियन्त्रण सम्बन्धमा पूर्वतयारी तथा विशेष सतर्कता अपनाउन भनिएको छ।” कुँवरले डेंगी संक्रमितको आँबुखैरेनी अस्पतालमा निःशुल्क उपचार भइरहेको उल्लेख गरे।

आँबुखैरेनीमा हालसम्म ३५० भन्दा बढीमा डेंगी संक्रमण पुष्टि भएको छ। डेंगी संक्रमण बढेपछि जनचेतनामूलक कार्यलाई जोड दिइएको गाउँपालिकाका स्वास्थ्य शाखा प्रमुख अगमराज उपाध्यायले जानकारी दिए।