रुस–युक्रेन युद्धमा ज्यान गुमाएका ५ नेपालीको अस्तुधातु परिवारलाई हस्तान्तरण

काठमाडौँ– रुसी सेनामा भर्ती भई युद्धका क्रममा मृत्यु भएका पाँच नेपाली नागरिकको रुसमै दाहसंस्कार गरी अस्तुधातु परिवारजनलाई हस्तान्तरण गरिएको छ।

युद्धमा मृत्यु भएका देवान राई, हरिप्रसाद अर्याल, प्रितम कार्की, अनितकुमार साह र गणेश श्रेष्ठको परिवारका सदस्यबाट सहमति लिई उतै दाहसंस्कार गरी अस्तुधातु नेपाल ल्याएर परिवारलाई आज सम्पर्क/हस्तान्तरण गरिएको परराष्ट्र मन्त्रालयले जनाएको छ।

मन्त्रालयको पछिल्लो तथ्यांकअनुसार रुसी सेनामा भर्ती भई समस्यामा परेका नेपाली नागरिकमध्ये सम्पर्कमै नरहेका भनी खोजी र फिर्ताका लागि परिवारबाट निवेदन दिएको संख्या ११८ जना रहेको छ। 

त्यस्तै, घाइते वा अन्य कारणले फिर्ता गराइदिन अनुरोध गरिएकाको संख्या १६६ रहेको मन्त्रालयले जनाएको छ। रुसी सेनामा भर्ती भएकामध्ये हालसम्म ३६ जनाको मृत्यु प्रमाणित भइसकेको छ।

रुसी सेनामा भर्ती भएका नेपाली नागरिकमध्ये घाइते भई उपचाररत रहेको जानकारी प्राप्त भएको सङ्ख्या पाँच (घाइते मध्ये एक जना नेपाल फिर्ता भइसकेको) छ। हालसम्म स्वदेश फर्किएकाको संख्या १६२, डीएनए परीक्षणका लागि अनुरोध भई आएको संख्या २२, र क्षतिपूर्तिका लागि नेपाल राजदूतावास, मस्कोबाट, कागजात माग भई आएको संख्या ५ रहेको मन्त्रालयले जनाएको छ।

यसैगरी मोरङका विकाश राई, कास्कीका नेत्रबहादुर थापा, रुपन्देहीका उदयराज थारु, भोजपुरका प्रितम राई, दार्चुलाका ललित सिंह डोवाल, कैलालीका हेमकुमार मगर, सल्यानका ताराप्रकाश घर्ती र रुकुमका रामकुमार बुढा मगरको नेपाली राजदूतावासबाट मृत्यु प्रमाणित भएर आउन बाँकी रहेको मन्त्रालयको तथ्यांकमा उल्लेख छ।

रुसी सेनामा भर्ती भएकामध्ये युद्धका क्रममा विवेक खत्री (वर्दिया), सिद्धार्थ ढकाल (काभ्रे), विकास राई (मोरङ), प्रतीक पुन (रोल्पा), सुजन सुवेदी (चितवन), ईश्वर लामिछाने (मकवानपुर) हालसम्म युक्रेनी सेनाको कब्जामा छन्। रासस