ताप्लेजुङको फक्ताङलुङमा पहिरो: २ घर र पुल बगे, कञ्चनजंघा पदमार्गमा क्षति

काठमाडौँ– ताप्लेजुङको फक्ताङलुङ गाउँपालिका–६ सेकाथुममा पहिरोले दुई घर बगाएको छ।

बुधबारको पहिरोले स्थानीय छिरिङ ठक्चे शेर्पाको होटल, घर र अलैँची बगान बगाएको वडाध्यक्ष पेम्बाटासी शेर्पाले बताए।

वडाध्यक्ष शेर्पाका अनुसार छिरिङले घर नजिकै कञ्चनजंघा पदमार्गमा अर्को घर बनाएर होटल सञ्चालन गर्दै आएका थिए। छिरिङ बुधबार दिउँसो सदरमुकाम गएको र होटलमा रहेकी उनकी छोरीसमेत बेलुका छिमेकीको घरमा गएकाले मानवीय क्षति भएको छैन। 

यसैबीच पहिरोले पर्यटकीय गाउँ घुन्सा हुँदै कञ्चनजंघा हिमाल जाने पदमार्ग र पदमार्गमा पर्ने घुन्सा खोलाको झलुंगे पुलसमेत बगाएको छ। पुल बगाएपछि हिमाल जाने पर्यटक र स्थानीयलाई समस्या भएको छ। पहिरो नरोकिएकाले तत्काल केही गर्न सक्ने अवस्था नरहेको वडाध्यक्ष शेर्पाको भनाइ छ।