टाँगामा भारत तस्करी गर्न लागिएको १७ लाखको ‘भेप’ बरामद

वीरगन्ज– सशस्त्र प्रहरी बलले १७ लाख १० हजार ६५० मूल्य बराबरको इलेक्ट्रिक चुरोट (भेप) बरामद गरेको छ। वीरगन्ज महानगरपालिका वडा–१६ स्थित भन्सार कार्यालयको मुख्यगेट नजिकैबाट भारततर्फ लैजाने क्रममा रहेको ४५० थान भेप बरामद गरिएको हो। 

सशस्त्र प्रहरी बल १३ नम्बर गणका डीएसपी देवेन्द्र सिंहले भन्सारको मुख्य गेट नजिकै प्रस्तावित सीमा सुरक्षा गुल्म वीरगन्जबाट खटिएको टोलीले चेकजाँचका क्रममा टाँगाभित्र फल्स बटम बनाएर लुकाएर राखेको इलेक्ट्रिक चुरोट बरामद गरेको जानकारी दिए। 

“भारततर्फ लैजानका लागि बाटोमा रोकिराखेको टाँगाबाट सो भेप बरामद भएको हो,” उनले भने, “बरामद भएको भेप वीरगन्ज भन्सार कार्यालयमा दाखिला गरेका छौँ।”

यसअघि पर्सा प्रहरीले गत साउन २४ गते पाँच करोड मूल्य पर्ने ७६ कार्टुन भेप बरामद गरेको थियो।