बझाङको बुङ्गलमा पहिरोले घर पुर्दा ४ जनाको मृत्यु

बझाङ– अविरल वर्षासँगै बझाङको बुङ्गल नगरपालिका–१० स्थित टुमेडा गाउँमा पहिरो जाँदा चार जनाको मृत्यु भएको छ। मृत्यु हुनेमा बुङ्गल–१० का टुमेडाका काली धामी, गोल्की धामी, आकृति धामी र लक्ष्मी धामी रहेका सहायक प्रमुख जिल्ला अधिकारी सत्यकुमारी जोशीले जानकारी दिइन्।

गए राति गएको पहिरोमा घर पुरिँदा चार जनाको मृत्यु भएको उनको भनाइ छ। “चार जनाको मृत्यु भएको र छ जनाको उद्धार गरिएको खबर छ, हामी राहत सामग्री लिएर प्रभावित क्षेत्रमा जाँदैछौँं,” उनले भनिन्।

पहिरोमा परी पुरिएका शव स्थानीय र प्रहरी टोलीको सक्रियतामा सोमबार बिहान निकालिएको हो। पहिरोमा पुरिएका अन्य छ जनाको जीवितै उद्धार गरिएको छ। वीरबहादुर धामी, उज्जल धामी, रोशन धामी, कमला धामी, अम्बादत्त जोशी र शान्ति धामीको जीवितै उद्धार गरिएको हो।