खोलामा पुल नहुँदा जोखिम मोलेर विद्यालय जान्छन् चुरेका बालबालिका

गोदावरी– चुरे गाउँपालिका–४ भएर बग्ने कालेखोलामा पुल नहुँदा यहाँका बालबालिका जोखिम मोलेर विद्यालय जान बाध्य छन्। वर्षायाममा उनीहरू जोखिमपूर्ण यात्रा गरेर जगातिस्थित समैजी आधारभूत विद्यालय जाने गर्छन्। 

कालेखोलामा पुल नहुँदा पानी परेका बेला तुडेपानी र बार्जुगडाका विद्यार्थीलाई अभिभावकले प्रत्येक बिहान र दिउँसो स्कुल पुर्‍याउने र ल्याउने गर्दै आएका छन्। विद्यार्थीले निथ्रुक्क भिजेर कक्षामा बस्नुपर्ने दयनीय अवस्था रहेको शिक्षक मदन विकले बताए। “कालेखोलामा पुल नहुँदा यस्तो बाध्यता परेको हो। ठूलो पानी पर्ने बित्तिकै स्कुल आउन सक्ने अवस्था हुँदैन,” उनले भने।

गाउँलेहरूले वर्षौंदेखि कालेखोलामा झोलुंगे पुलको माग गर्दै स्थानीय तह, जिल्ला र प्रदेशका कार्यालयमा अनुरोध गरेका भए पनि त्यसको सुनुवाइ नभएको स्थानीय हेमबहादुर विष्टले बताए।

चुरे–४ का वडाध्यक्ष चन्द्रबहादुर लामिछाने मगरले वडालाई प्राप्त हुने सीमित बजेटले सडक, पुल तथा तटबन्ध निर्माण गर्न नसकिएको बताए।