मन्त्रालय छनोटमा असन्तुष्टि जनाउँदै मन्त्री कृष्णा केसीले दिइन् राजीनामा

रूपन्देही– लुम्बिनी प्रदेशका विनाविभागीयमन्त्री कृष्णा केसीले पदबाट राजीनामा दिएकी छन्। मन्त्रालय छनोटमा असन्तुष्टि व्यक्त गर्दै उनले शनिबार मुख्यमन्त्री लीला गिरीसमक्ष राजीनामा दिएकी हुन्।

गत पुस २८ गते केसीले विनाविभागीय मन्त्रीका रूपमा शपथग्रहण गरेकी थिइन्। मुख्यमन्त्री लीला गिरीले आइतबार मन्त्रिमण्डल विस्तारको तयारी गरेको उनको निजी सचिवालयले जनाएको छ।

नेकपा माओवादी केन्द्रका तर्फबाट विनाविभागीयमन्त्री बनेकी केसीको राजीनामा सरकारसँगको असन्तुष्टिका कारण नभएको मन्त्री तथा सरकारका प्रवक्ता चेतनारायण आचार्यले बताए। उनले भने, “मन्त्री केसीको राजीनामा उहाँको पार्टीभित्रको समस्या होला, सरकारसँगको असहमतिबाट होइन।”

गिरी गत पुस २७ गते मुख्यमन्त्रीमा नियुक्त भएका थिए। उनले यही माघ ५ गते प्रदेशसभामा विश्वासको मत पाएका थिए।