दोस्रो अभ्यास खेलमा नेपाल नेदरल्यान्ड्ससँग पराजित

काठमाडौँ–  दोस्रो एकदिवसीय अभ्यास खेलमा नेपाल नेदरल्यान्ड्ससँग ५ विकेटले पराजित भएको छ।

शनिबार भएको खेलमा जितका लागि पाएको १५७ रनको लक्ष्य नेदरल्यान्ड्सले ३६.१ ओभरमा ५ विकेट गुमाउँदै पूरा गर्‍यो।

नेदरल्यान्ड्सका वेस्ली ब्यारेसी ८८ बलमा सर्वाधिक ६३ रनमा अविजित रहे। उनले ४ चौका ६ छक्का प्रहार गरे। कप्तान स्कट एडवार्ड ३४ बलमा २२ रन बनाउँदै आउट भए। 

नेपालका गुलशन झा र ललित नारायण राजवंशीले समान २/२ तथा प्रतिश जिसीले १ विकेट लिए। 

त्यसअघि टस हारेर पहिले ब्याटिङको निम्तो पाएको नेपालले ३६.५ ओभरमा अलआउट हुँदै १५६ रन बनाएको थियो।

नेपालका कप्तान रोहित पौडेलले सर्वाधिक ३० रन बनाए। उनले ४१ बलमा ४ चौका र १ छक्का प्रहार गरे। गुलशन झा ३२ बलमा ३ चौका र १ छक्कासहित २४ रनमा आउट भए। प्रतिश जिसीले १९ रन बनाए।

नेदरल्यान्ड्सका तीव्र गतिका बलर लोगन भान बिकले सर्वाधिक ५ विकेट लिए।

यसअघि नेपाल पहिलो अभ्यास खेलमा स्कटल्यान्डसँग ७ विकेटले पराजित भएको थियो।