टेलिकमका तत्कालीन एमडी सुनिल र मुद्रण केन्द्रका कार्यकारी निर्देशक विकल पौडेल पक्राउ

काठमाडौँ– अख्तियार दुरूपयोग अनुसन्धान आयोगले भ्रष्टाचार गरेको अभियोगमा नेपाल टेलिकमका तत्कालीन प्रबन्ध निर्देशक(एमडी) सुनिल पौडेल र सुरक्षित मुद्रण केन्द्रका तत्कालीन कार्यकारी निर्देशक विकल पौडेललाई पक्राउ गरेको छ।

आयोगका प्रवक्ता नरहरि घिमिरेका अनुसार नेपाल राष्ट्र बैंकको स्वीकृतिबेगर विदेशी बैंकमा विदेशी मुद्रामा खाता खोली रकम जम्मा गरेकोलगायत अभियोगका आधारमा उनीहरूलाई पक्राउ गरिएको हो। 

गैरकानूनी रूपमा सम्पत्ति आर्जन गरेको अभियोगमा उनीहरूविरुद्ध आयोगले यसअघि नै मुद्दा दायर गरेको थियो। अकुत सम्पत्ति आर्जनको अभियोगमा दुवै जना निलम्बनमा छन्। नेपालको सरकारी सेवामा कार्यरत रहँदाकै अवस्थामा अन्तर्राष्ट्रिय परामर्शदाताको पदमा औपचारिकरूपमा नियुक्ति लिएको आयोगको ठहर छ।

आयोगका अनुसार विकल पौडेललको हकमा संयुक्त राज्य अमेरिकाको स्थायी आवासीय अनुमति लिएको पाइएको छ। निजले कसुरसम्बद्ध प्रमाण नष्ट गर्न सक्ने, भागी जाने सम्भावनासमेत भएकाले अनुसन्धान कार्यमा बाधा नपुगोस् भन्ने उद्देश्यले उनीहरूलाई बुधबार पक्राउ गरिएको आयोगका प्रवक्ता घिमिरेद्वारा जारी विज्ञप्तिमा उल्लेख छ।

"निजहरूले कसुरसम्बद्ध प्रमाण नष्ट गर्न सक्ने र भागी जाने सम्भावना भई अनुसन्धान कार्यमा बाधा पुग्ने देखिएकोले निजहरूलाई मिति २०८०-१०-१० गते नियमानुसारको जरुरी पक्राउ पुर्जी दिई हिरासतमा लिई थप अनुसन्धान भइरहेको छ," विज्ञप्तिमा भनिएको छ।