रियल मड्रिडले जित्यो अन्तरमहादेशीय कप

काठमाडौँ– अन्तरमहादेशीय कप फुटबल २०२४ को उपाधि स्पेनिस क्लब रियल मड्रिडले जितेको छ।

कतारस्थित लुसेल स्टेडियममा बुधबार राति सम्पन्न फाइनलमा मेक्सिकोको पाचुकालाई ३–० ले हराउँदै रियल च्याम्पियन बनेको हो।

रियलको जितमा केलियन एमबाप्पे, रोड्रिगो र भिनिसियस जुनियरले समान १–१ गोल गरे। पाचुकाले काउन्टर अट्याकमा केही मुभ बनाए पनि गोल गर्न सकेन।

३७औँ मिनेटमा एमबाप्पेले गोल गर्दै टोलीलाई अग्रता दिलाए। दोस्रो हाफको सुरुमै रोड्रिगोले गोल गर्दै अग्रता दोब्बर पारे। ८३औँ मिनेटमा ओसामा इड्रिसीले लुकास भाज्क्वेजलाई बक्सभित्र फाउल गरेपछि रियलले पेनाल्टीको अवसर पायो। सो अवसरमा भिनिसियसले गल्ती गरेनन्।