रुसबाट किभ फर्केए ४९ युक्रेनी युद्धबन्दी

युक्रेनका राष्ट्रपति भोलोदिमर जेलेन्स्कीले शुक्रबार ४९ युक्रेनी युद्धबन्दी रुसबाट फिर्ता भएको बताएका छन्। युद्धबन्दीको समूहलाई बेलारुससँगको सीमामा स्वागत गरिएको थियो।

सामान्यतया हुने गरेजस्तै यो रुससँगको आदानप्रदान थियो या थिएन भन्नेबारे जेलेन्स्कीले स्पष्ट पारेनन्। तर एएफपीका पत्रकारहरूले पहिले रुसी युद्धबन्दीलाई सीमा नजिकैको बसमा राख्दै गरेको देखेका थिए।

रुसको कुर्स्क क्षेत्रमा किभको आश्चर्यजनक आक्रमणपछि युद्धरत दुवै मुलुकबीच दोस्रो युद्धबन्दी आदानप्रदान हुनेछ। 

जेलेन्स्कीका अनुसार ‘आफ्नो बिरामी बुबाको हेरचाहका लागि आउँदा बन्धक बनाइएकी किशोरी’ लगायतका सर्वसाधारणहरू फर्किएका हुन्। उनले यो आदानप्रदानमा मारियुपोलको सन् २०२२ अजोभास्टल युद्धका लडाकुका साथै सैनिक, सीमा रक्षक र प्रहरी अधिकारी पनि समावेश रहेको बताए।

एएफपीले युक्रेनी झन्डामा बेरिएका र फूल ग्रहण गरिरहेका दुई महिलाले उनीहरू सन् २०२२ मा घेराबन्दीपछि रुसको कब्जामा परेको अजोभास्टल संयन्त्रमा रहेको बताए। 

“अन्ततः म घरमा छु, मलाई विश्वास भइरहेको छैन”, युक्रेनको नेसनल गार्डको सशस्त्र वाहनका कमान्डर २८ वर्षीया तमारा मिरोशनिकोभाले भनिन्। 

अजोभास्टलका लागि लडेकी अर्की २९ वर्षीया महिला टेटियाना बुगायले उनी अजोभ ब्रिगेडमा चिकित्सक रहेको बताइन्। 

यसअघि एएफपीले युक्रेनी सेनाले एउटा बसमा रुसी युद्धबन्दीहरूलाई लैजाँदै गरेको देखेको थियो। केहीले आफ्नो अनुहार लुकाउन हुड लगाएका थिए। एउटा मिनीभ्यानमा राख्दा उनीहरूको हुड हटाइएको थियो।

एएफपीले तीमध्ये केहीसँग संक्षिप्त कुरा गरेको थियो र बोल्ने सबैले उनीहरूलाई गत महिना युक्रेनको आश्चर्यजनक कुर्स्क आक्रमणमा बन्दी बनाइएको बताएका थिए।