स्पेनिस ला लिगा: बार्सिलोनाको जितमा यमलको २ गोल

काठमाडाैँ– स्पेनिस ला लिगामा शीर्ष स्थानमा रहेको बार्सिलोनाले निरन्तर पाचौँ खेलमा जित हात पारेको छ। आइतबार भएको खेलमा लामिन यमलको दुई गोलसँगै बार्सिलोनाले जिरोनालाई ४-१ ले पराजित गरेको हो।

जिरोनाको घरेलु मैदानमा भएको खेलमा बार्सिलोनाको जितका लागि यमलले २ तथा डानी ओल्मो र पेड्रीले १/१ गोल गरे। जिरोनाका लागि क्रिस्टियन स्टुआनीले गरेको गोल सान्त्वना रह्यो।

खेलको ३०औँ मिनेटमा पहिलो गोल गरेका यमलले ७ मिनेटपछि अर्को गोल गर्दै टोलीलाई दोहोरो अग्रता दिलाए। खेलको ४७औँ मिनेटमा ओल्मोले बार्सिलोनाका लागि तेस्रो गोल गरे।

खेलको ६४औ‍ँ मिनेटमा पेड्रीले बार्सिलोनाको अग्रता ४-० मा पुर्‍याए। खेल सकिन १० मिनेट बाँकी रहँदा स्टुआनीले घरेलु टोलीका लागि एक गोल गरे। ८६औँ मिनेटमा बार्सिलोना १० खेलाडीमा समेटियो। उसका फेरान टोरेसले रातो कार्ड पाएर मैदान छाडे।

जितसँगै बार्सिलोनाले ५ खेलबाट १५ अंक जोडेको छ। बार्सिलोना दोस्रो स्थानको अट्लेटिको मेड्रिडको भन्दा ४ अंकले अघि रहेको छ। पराजित जिरोना समान खेलबाट ७ अंक जोड्दै सातौँ स्थानमा छ।