२०६ घण्टा बैठक बसेर अन्त्य भयो प्रतिनिधिसभाको चालु अधिवेशन

काठमाडौँ– संघीय संसद्को दुवै सदनको चालु अधिवेशन सोमबार रातिदेखि अन्त्य गरिएको छ। प्रतिनिधिसभाको सोमबारको बैठकमा राष्ट्रपतिको कार्यालयबाट प्राप्त पत्र पढेर सुनाउँदै सभामुख देवराज घिमिरेले प्रतिनिधिसभाको चालु चौथो अधिवेशन सोमबार रातिदेखि अन्त्य हुने बताए।

“नेपालको संविधानको धारा ९३ को उपधारा २ बमोजिम नेपाल सरकार मन्त्रिपरिषद्को २०८१ भदौ ३० गतेको सिफारिसमा सङ्घीय संसद्को दुवै सदनको चालु अधिवेशन २०८१ साल भदौ ३१ गते राति १२ बजेबाट लागू हुने गरी अन्त्य भएको छ”, राष्ट्रपतिको कार्यालयबाट प्राप्त पत्र पढेर सुनाउनुहुँदै सभामुख घिमिरेले भने।

सभामुख घिमिरेले प्रतिनिधिसभाको चालु चौथो अवधिभर भए–गरेका काम कारबाहीको विवरण सोमबारको बैठकमा सुनाएका थिए। प्रतिनिधिसभाको चौथो अधिवेशन २०८१ वैशाख २८ गते प्रारम्भ भई २०८१ भदौ ३१ गतेसम्म १३० दिन चलेको छ। जसमध्ये ५३ दिनमा ५६ पटक बैठक बस्दा २०६ घण्टा २५ मिनेट समय संसदीय काम कारबाहीमा व्यतीत भएको सभामुख घिमिरेले बताए। यस अवधिमा संघीय संसद्का दुवै सदनको संयुक्त बैठक बसेको थियो।

यो अधिवेशनमा प्रतिनिधिसभामा आठ वटा सरकारी र एउटा गैरसरकारी विधेयक दर्ता भएका छन्। जसमध्ये पाँच वटा विधेयक संघीय संसद्को दुवै सदनबाट पारित भएको र तीन वटा विधेयक समितिमा विचाराधीन रहेको सभामुख घिमिरेले बताए।

त्यसै गरी, सभाको पहिलो, दोस्रो र तेस्रो अधिवेशनमा दर्ता भएका १३ वटा विधेयकमध्ये सात वटा विधेयक सम्बन्धित समितिमा विचाराधीन र एउटा विधेयक दुवै सदनबाट पारित भएको छ। राजनीतिक दलसम्बन्धी दोस्रो संशोधन विधेयक २०८० लाई सरकारले फिर्ता लिएको छ। 

प्रतिस्थापन विधेयकका रूपमा दर्ता भएको आर्थिक कार्यविधि तथा वित्तीय उत्तरदायित्व पहिलो संशोधन विधेयक २०८० समयमै पारित हुन नसक्दा र औषधि तथा स्वास्थ्य सामग्री नियमन तथा नियन्त्रण विधेयक २०८० सम्बन्धी गैरसरकारी विधेयक दर्ता गर्ने सांसद मन्त्री भएका कारण स्वतः निष्क्रिय भएको सभामुख घिमिरेले बैठकमा जानकारी गराए।

प्रतिनिधिसभाको चालु अधिवेशनमा लगातार १० वा सोभन्दा बढी बैठकमा अनुपस्थित भएका सांसदहरूको अनुपस्थितिको सङ्ख्यालाई सोमबारको बैठकले स्वीकृति जनाएको छ। चालु अधिवेशनमा सांसदहरू गीता बस्नेत ४७ दिन, मनोरमा शेरचन ५६ दिन, अम्बिका बस्नेत २६ दिन, राजु थापा १० दिन, डा. नारायण खड्का १६ दिन, प्रकाशमान सिंह १७ दिन, डा सुनीलकुमार शर्मा ११ दिन, कान्तिका सेजुवाल १५ दिन, वसन्तकुमार नेम्वाङ ५६ दिन, प्रेमबहादुर महर्जन १० दिन, गोकर्णबहादुर विष्ट १२ दिन, दीपक बोहरा ५६ दिन र कालुराम राई १८ दिन बैठकमा अनुपस्थित रहेको थियो। सांसदहरूको अनुपस्थितिको सङ्ख्यालाई सोमबारको बैठकले स्वीकृति जनाएको छ।