प्रतिकूल मौसमले हवाई उडान प्रभावित

काठमाडौँ– प्रतिकूल मौसमका कारण मुलुकको हवाई उडान प्रभावित भएको छ। मौसमका कारण त्रिभुवन अन्तर्राष्ट्रिय विमानस्थलबाट हुने आन्तरिक तथा अन्तर्राष्ट्रिय दुवै उडान प्रभावित भएको विमानस्थल कार्यालयले जनाएको छ।

विमानस्थलका प्रवक्ता रिञ्जी शेर्पाका अनुसार आन्तरिकतर्फ जनकपुर, भैरहवा, नेपालगन्ज र धनगढी विमानस्थलमा मात्रै उडान भइरहेका छन्।

भद्रपुर, सिमरा, भरतपुर, पोखरा र सुर्खेत विमानस्थलमा शुक्रबार कुनै पनि उडान नभएका बताउँदै विराटनगरतर्फ दिउँसो ३ बजेदेखि नियमित उडान भइरहेका उनले जानकारी दिए। अन्तर्राष्ट्रियतर्फ पनि दुई विमान करिब एक घण्टा ‘होल्ड’मा परेर अवतरण गरेका प्रवक्ता शेर्पाले बताए।

भारतको नयाँ दिल्लीबाट काठमाडौँ आइरहेको इन्डिनको एयरलाइन्सको विमान र थाइल्यान्डको बैंककबाट आएको थाई एयर होल्डमा परेका बताउँदै अन्य अन्तर्राष्ट्रिय उडान पनि केही ढिलाइ (डिले) भएका उनले जानकारी दिए। अन्तर्राष्ट्रिय उडान भने अहिले नियमित भइरहेका छन्।

लगातारको वर्षाले भिजिबिलिटी कमजोर हुँदा हवाई उडान प्रभावित भएको हो। काठमाडौँ विमानस्थलमा ‘इन्ट्रमेन्ट फ्लाइट रुल्स’ (आईएफआर) उडान मात्रै भइरहेका प्रवक्ता शेर्पाले बताए। मौसमी प्रतिकूलताका कारण शुक्रबारका लागि कुनै पनि पर्वतीय उडान (माउन्टेन फ्लाइट) नभएका एयरलाइन्सले जनाएका छन्।

देशभर मनसुनी वायुको प्रभाव रहनुका साथै भारतको उत्तरमध्य महाराष्ट्र तथा आसपासको क्षेत्रमा रहेको न्यून चापीय प्रणालीको पनि प्रभाव रहेकाले मौसममा बदली हुनुका साथै वर्षा गराएको जल तथा मौसम विज्ञान विभाग मौसम पूर्वानुमान महाशाखाले जनाएको छ।