विपद्‌मा परी मृत्यु हुनेको संख्या २१७ पुग्यो, २८ जना बेपत्ता

काठमाडौँ– असोज ११ र १२ गतेको अविरल वर्षापछिको बाढीपहिरो र डुबानका कारण २१७ जनाको मृत्यु भएको छ। २८ जना बेपत्ता छन् ।

प्राकृतिक विपद्‌मा १४३ जना घाइते भएको गृह मन्त्रालयका प्रवक्ता ऋषिराम तिवारीले जानकारी दिए। बाढी, पहिरोपछिको खोज, उद्धार र राहतका लागि सबै सुरक्षा निकाय परिचालित भइरहेको उनको भनाइ छ। 

बाढी प्रभावितलाई खाद्यान्नलगायत आपत्कालीन राहत सामग्री उपलब्ध गराइएको तथा घाइतेको निःशुल्क उपचार भइरहेको जनाइएको छ।

सरकारले खोज, उद्धार र राहतलाई उच्च प्राथमिकता दिएको र यातायात सञ्चालन गर्न अवरुद्ध राजमार्ग खोल्न पहल भइरहेको प्रवक्ता तिवारीले बताए।