कोशी, बागमती र गण्डकीमा हल्का वर्षाको सम्भावना

काठमाडौँ– देशभर मनसुनी वायुको प्रभाव रहेको छ। पूर्वी र मध्यभागमा दक्षिण-पश्चिम बांग्लादेश आसपास बनेको न्यूनचापीय प्रणालीको आंशिक प्रभाव रहेको मौसम पूर्वानुमान महाशाखाले जनाएको छ।

जसको प्रभावले कोशी र बागमतीमा आंशिकदेखि साधारणतया बदली रहेको छ। कोशी र  बागमतीका थोरै स्थानमा मेघगर्जन र चट्याङसहित हल्कादेखि मध्यम वर्षा भइरहेको छ।

दिउँसो कोशी, मधेश, बागमती र गण्डकीलगायत देशका पहाडी भूभागमा आंशिकदेखि साधारणतया बदली रहनेछ। 

कोशी, बागमती र गण्डकीका थोरै तथा बाँकी प्रदेशका एक-दुई स्थानमा मेघगर्जन र चट्याङसहित हल्कादेखि मध्यम वर्षाको सम्भावना छ। कोशीका एक-दुई स्थानमा भने भारी वर्षा हुने महाशाखाले जनाएको छ।

यसैगरी, राति देशभर आंशिकदेखि साधारणतया बदली रहनेछ। कोशी, बागमती र गण्डकीका थोरै तथा बाँकी प्रदेशका एक-दुई स्थानमा मेघगर्जन र चट्याङसहित हल्कादेखि मध्यम वर्षा हुनेछ।