यस्तो रहनेछ शनिबारको मौसम

काठमाडौँ– देशभर मनसुनी वायुको प्रभाव रहेको छ। पूर्वी र मध्य भागमा बांग्लादेशको उत्तर भूभाग तथा भारतको पश्चिम बंगाल आसपास बनेको न्यूनचापीय प्रणालीको आंशिक प्रभाव रहेको छ।

जसको प्रभावले कोशी, मधेश र बागमतीमा आंशिकदेखि साधारणतया बदली रहेको छ। कोशी र बागमतीका केही स्थानमा हल्का वर्षा भइरहेको मौसम पूर्वानुमान महाशाखाले जनाएको छ।

दिउँसो कोशी, मधेश, बागमती र गण्डकीमा आंशिकदेखि साधारणतया बदली रहनेछ। बाँकी भूभागमा मुख्यतया सफा रहने महाशाखाले जनाएको छ।

कोशी, मधेश, बागमती र गण्डकीका थोरै तथा बाँकी प्रदेशका एक-दुई स्थानमा मेघगर्जन र चट्याङसहित हल्कादेखि मध्यम वर्षा हुनेछ। 

राति कोशी, मधेश, बागमती, गण्डकी र लुम्बिनीका थोरै तथा बाँकी प्रदेशका एक-दुई स्थानमा मेघगर्जन र चट्याङसहित हल्कादेखि मध्यम वर्षा हुने महाशाखाले जनाएको छ।