पूर्वसचिव खनालको नेतृत्वमा आर्थिक क्षेत्र सुधार सुझाव आयोग गठन

काठमाडौँ– सरकारले पाँच सदस्यीय उच्चस्तरीय आर्थिक क्षेत्र सुधार सुझाव आयोग गठन गरेको छ। अर्थ मन्त्रालयको प्रस्तावमा सोमबार बसेको मन्त्रिपरिषद्को बैठकले पूर्वअर्थसचिव रामेश्वर खनालको नेतृत्वमा आयोग गठन गरेको हो। 

खनालको संयोजकत्वमा विज्ञहरूको उच्चस्तरीय आर्थिक क्षेत्र सुधार सुझाव आयोग गर्ने निर्णय गरेको सरकारका प्रवक्ता एवं सञ्चारमन्त्री पृथ्वीसुब्बा गुरुङले जानकारी दिए। 

उनका अनुसार आयोगका सदस्यमा राष्ट्रिय योजना आयोगका सदस्य डा. प्रकाशकुमार श्रेष्ठ, त्रिभुवन विश्वविद्यालय अर्थशास्त्र केन्द्रीय विभागका प्रमुख प्राडा. रामप्रसाद ज्ञवाली रहेका छन्। 

त्यस्तै, अर्थविद् डा. विश्वास गौचन र नीति अनुसन्धान प्रतिष्ठानका वरिष्ठ अनुसन्धानकर्ता डा. कल्पना खनाल पनि आयोगको सदस्यका रूपमा रहेका छन्। आयोगले आवश्यकताअनुसार निजी क्षेत्र लगायत अर्थतन्त्रका विविध पक्षहरूसँग परामर्शसमेत गर्ने सञ्चारमन्त्री गुरुङको भनाइ छ।

अर्थ मन्त्रालयले एक सय दिनमा सम्पन्न गर्ने कार्यको सूचीमा उच्चस्तरीय आर्थिक क्षेत्र सुधार सुझाव आयोग गठन गर्ने बुँदा पनि समावेश थियो। आयोगले कार्यविधि आफैँ बनाउने छ।