एआईसम्बन्धी आविष्कारका लागि जोन र जेफ्रीलाई भौतिकशास्त्रको नोबेल पुरस्कार

अमेरिकी जोन होपफिल्ड र बेलायती–क्यानडाली जेफ्री हिन्टनले मंगलबार कृत्रिम बौद्धिकता (एआई)को विकासमा अग्रणी कामका लागि यस वर्षको भौतिकशास्त्रतर्फको नोबेल पुरस्कार प्राप्त गरेका छन्।

जुरीका अनुसार उनीहरूलाई ‘कृत्रिम न्युरल नेटवर्कसँग मेसिन लर्निङ सक्षम बनाउने आधारभूत खोज र आविष्कारका लागि’ नोबेल पुरस्कार प्रदान गर्न लागिएको हो।

स्विडिस रोयल एकेडेमी अफ साइन्सेसले वक्तव्यमा भनेको छ, “यस वर्षको भौतिकशास्त्रमा दुई नोबेल पुरस्कार विजेताले अहिलेको शक्तिशाली मेसिन लर्निङको आधार रहेको विधि विकास गर्न भौतिकशास्त्रका उपकरण प्रयोग गर्नुभएको छ।”

वक्तव्यमा प्रिन्स्टन विश्वविद्यालयका ९१ वर्षीय प्राध्यापक होपफिल्डलाई ‘एसोसिएटिभ मेमोरी सिर्जना गरेको’ र ‘यसले दृश्य र डेटाका अन्य प्रकारका ढाँचा भण्डारण गर्न र पुनर्निर्माण गर्न सक्छ’ भनी उल्लेख गरिएको छ।

जुरीले टोरन्टो विश्वविद्यालयका ७६ वर्षीय प्राध्यापक हिन्टनले ‘डेटामा स्वायत्त रूपमा गुणहरू पत्ता लगाउन सक्ने विधि आविष्कार गर्नुभएको र उक्त आविष्कारले तस्वीरहरूमा विशिष्ट तत्त्वहरू पहिचान गर्ने जस्ता कार्य गर्न सक्छ’ भनेको छ। 

स्टकहोममा पुरस्कार विजेताको घोषणा गर्ने क्रममा हिन्टनले फोन अन्तर्वार्तामार्फत सञ्चारकर्मीसँग भने, “म अचम्मित छु... यस्तो हुनसक्छ भनेर मलाई थाहै थिएन।”

दुवै जनाले स्टकहोममा राजा कार्ल सोह्रौँ गुस्ताफबाट डिसेम्बर १० मा डिप्लोमा, सुनको पदक र १० लाख डलरको चेकसहितका पुरस्कार प्राप्त गर्ने छन्। उक्त दिन अल्फ्रेड नोबेलको सन् १९८६ मा निधन भएको वार्षिकी हो।

गत वर्ष भौतिकशास्त्रको नोबेल पुरस्कार फ्रान्सका पियरे एगोस्टिनी, हङ्गेरी–अस्ट्रियाली फेरेन्क क्राउज र फ्रान्को–स्विडिस एन ल’हुइलियरलाई अति छिटो प्रकाश फ्ल्यासहरू प्रयोग गरेर परमाणु र अणुहरूभित्रका इलेक्ट्रोनको अध्ययन गर्न सक्षम बनाउन गरिएको अनुसन्धानका लागि दिइएको थियो।

नोबेल मौसममा यस साता बुधबार रसायनशास्त्र पुरस्कार विजेताको घोषणासँगै जारी रहनेछ। त्यसपछि बिहीबार साहित्य र शुक्रबार शान्तिका लागि अत्यधिक प्रतीक्षित पुरस्कार घोषणा हुने छन्। अर्थशास्त्रका लागि सोमबार पुरस्कार घोषणासँगै सबै प्रक्रिया सकिने छ।

पुरस्कार सिर्जनाकर्ता तथा वैज्ञानिक अल्फ्रेड नोबेलका शब्दहरूमा जसले ‘मानवजातिलाई सबैभन्दा ठूलो फाइदा प्रदान गरेका छन्’ तिनीहरूलाई सन् १९०१ देखि प्रदान गरिँदै आएको नोबेल पुरस्कारले सम्मानित गर्दछ।