दशैँ बिदाअघिको अन्तिम दिन सामान्य अंकले बढ्यो नेप्से

काठमाडौँ- दशैँअघिको अन्तिम दिन नेप्से सामान्य अंकले बढेको छ। बुधबार नेप्से परिसूचक ४.८५ अंकले बढेर २६६८.१७ अंक पुगेको छ। 

बुधबार नेप्से परिसूचकमा उतारचढाव आएको थियो। दिनभरमा न्यूनतम २६४४ अंक र अधिकतम २६७२ अंकमा पुगेको थियो। कारोबार रकम भने घटेको छ। दिनभरमा ३ अर्ब ७६ करोड रुपैयाँ कारोबार भएको छ। अघिल्लो दिन साढे ४ अर्बको कारोबार भएको थियो। नेप्से भने २७ अंकले घटेको थियो।

बुधबार लगानीकर्ताले २९४ कम्पनीको ८३ लाख १२ हजार कित्ता सेयर कारोबार गरेका छन्। जसमा १३० वटा कम्पनीको मूल्य बढेको छ भने १०२ वटाको मूल्य घटेको छ। 

दुई वटा कम्पनीको सेयरमा भने सकारात्मक सर्किट लागेको छ। मिडसोलु हाइड्रो र युनाइटेड मोदी हाइड्रोको सेयर मूल्यमा १० प्रतिशतको वृद्धिसहित सकारात्मक सर्किट लागेको हो। अप्पर स्यांगे हाइड्रो र राप्ती हाइड्रो एन्ड जनरल कन्स्ट्रक्सनको ९ प्रतिशतले बढेको छ। 

थ्रि स्टार हाइड्रोको सेयर मूल्यमा भने १० प्रतिशतले घटेर नकारात्मक सर्किट लागेको छ। कारोबारको आधारमा नेपाल फाइनान्स अगाडि देखियो। यो कम्पनीको २२ करोडको सेयर कारोबार भएको छ।