सातदोबाटोमा रोकेर राखेको बसमा आगलागी

ललितपुर– ललितपुरको सातदोबाटोमा रोकेर राखिएको सार्वजनिक बसमा आगलागी भएको छ। 

ललितपुर महानगरपालिका–१५ सातदोबाटो चोकनजिक रोकेर राखेको अवस्थामा शनिबार अपराह्न आगलागी भएको हो।

चक्रपथमा चल्ने महानगर यातायातको बा४ख १०६ नम्बरको बसमा आगलागी भएको जिल्ला प्रहरी कार्यालय ललितपुरका सूचना अधिकारी तथा प्रहरी उपरीक्षक रवरत्न पौडेलले दिए। 

सातदोबाटोबाट ग्वार्कोतर्फ जाँदै गरेको बस ‘बस पाकेट’मा रोकेर राखिएको थियो। बसमा अचानक तार ‘सट’ भई आगलागी भएको उन बताए। 

बसमा आगलागी भएको खबर प्राप्त हुनासाथ प्रहरी टोली र ललितपुर महानगरपालिकाका दुई वटा दमकल प्रयोग गरेर आगो निभाइएको थियो। आगलागीबाट बस पूर्ण रूपमा क्षति भएको छ।