२० अंकले घट्यो शेयरबजार

काठमाडाैँ– साताको शुरूका दुई दिन घटेर मंगलबार बढेको बजार आज फेरि घटेको छ। बुधबार शेयरबजार परिसूचक नेप्से २०.४१ अंकले घटेर २६४५.३९ विन्दुमा झरेको छ भने कारोबार रकम भने बढेको छ। आज ६ अर्ब २७ करोड ८९ लाख ५१ हजार ८५३ रुपैयाँ बराबरको १ करोड ५७ लाख ४२ हजार ५१४ कित्ता शेयर खरिदबिक्री भएको छ।

आज १३ उपसमूहमा फाइनान्स र व्यापारबाहेक सबै उपसमूहको सूचक नकारात्मक देखिएको छ, जसमा बैंकिङ उपसमूह सबैभन्दा धेरै १.७० प्रतिशतले घटेको छ। आईसीएफसी फाइनान्सको सबैभन्दा धेरै ४३ करोड ४४ लाख रुपैयाँको कारोबार भएको छ भने कुमारी बैंकको २६ करोड ९७ लाख र साहस उर्जाको २६ करोड १७ लाख रुपैयाँको शेयर कारोबार भएको छ।

कारोबारमा आएका कम्पनीहरूमध्ये बुधबार आईसीएफसी फाइनान्सको शेयरमूल्य सबैभन्दा धेरै १० प्रतिशतले बढेको छ भने समृद्धि फाइनान्सको ९.९३ प्रतिशत र मञ्जुश्री फाइनान्सको ६.६७ प्रतिशतले बढेको छ। यस्तै, महुली लघुवित्तको शेयरमूल्य सबैभन्दा धेरै ४.२८ प्रतिशत तथा हिमालयन बैंकको ४.०७ प्रतिशतले घटेको छ।